Afërsisht 50 ari sipërfaqe me shkurre në Parkun e Lirisë të Ferizajt janë djegur në orët e para të së martës. Zyrtarët komunal të Ferizajt së bashku me autoritetet policore dhe zjarrfikësit kanë vlerësuar se ka qenë një zjarrvënie të qëllimshme dhe këtë duhet parë me shqetësim. Sipas zyrtarëve nuk bëhet fjalë për djegie të pishave, por për shkurre që ndodhen në një terren të rrëpinjtë, gjë që ka shtuar dyshimet për zjarrëvënie të qëllimshme apo për një veprim që ka ndodhur nga pakujdesia e njeriut.
"Ne bashkë me policinë dhe autoritetet e Brigadës së Zjarrfikësve kemi dalë në vendin e ngjarjes dhe kemi ardhur deri tek këto përfundime" ka thënë Ibrahim Hyseni, drejtor komunal për Shërbime Publike dhe Emergjenca.
Nisur nga kjo situatë dhe me qëllim të preventimit të shpërthimit të zjarreve, drejtori Hyseni ka thënë se bashkë me autoritetet e sigurisë kanë përpiluar një plan të përbashkët veprimi. Sipas këtij plani, qytetarët nuk mund të kenë qasje në brendi të parkut me automjete, por deri tek hyrja, ndërsa policët dhe zjarrfikësit do të patrullojnë 24 orë në këtë zonë. Ndër masat tjera, zyrtarët kanë përmendur edhe rritjen e numrit të zjarrfikësve, varësisht nga situata në terren.
Me qëllim të ruajtjes së mjedisit në këtë zonë atraktive që frekuentohet shumë nga ferizajasit, zyrtarët komunal u kanë bërë thirrje qytetarëve që të shmangin gatimet në zonë, të mos ndezin zjarre sepse ekziston mundësia e përhapjes së tyre, ndërsa mbeturinat që krijojnë t’i deponojnë në vende të caktuara për mbeturina.
"Qytetarët duhet të kenë kujdes në këtë kohë kur temperaturat janë mjaft të larta dhe nuk duhet të ndezin zjarre. Zjarrvënia e qëllimshme sanksionohet me ligjet në fuqi. ne u bëjmë thirrje për një kujdes më të shtuar, me të vetmin qëllim që të ruajmë këtë zonë të bukur" ka thënë drejtori Hyseni.
Në Parkun e Lirisë, në një pjesë të tij, është i instaluar edhe sistemi i vëzhgimit me kamera. Pavarësisht kësaj, zyrtarët komunal u kanë bërë thirrje qytetarëve që të mos ekzistojnë të thërrasin numrin emergjent të zjarrfikësve 193, në raste të shpërthimit të zjarreve në këtë zonë apo gjetiu.
Ndryshe, statistikat flasin se në muajt tropikal ka pasur intervenime nga zjarrfikësit. Kryesisht, sipas zyrtarëve, gjatë kësaj periudhe janë përballur me zjarre fushore, apo me djegien e ndonjë objekti të amortizuar që ka shërbyer si stallë për ushqimin e bagëtive. Drejtori Hyseni ka thënë se krahasuar me periudhat e njëjta të viteve të mëparshme, mbizotëron një situata më e mirë.
Digjen 50 ari sipërfaqe me shkurre në Parkun e Lirisë
