Shpalosjes së lapidarit të dëshmorit i ka parapri një manifestim popullor, në të cilën folësit e kanë lartësuar figurën e dëshmorit, guximin dhe heroizmin e tij, vyrtyte këto që kishin zënë vend me kohë në shpirtin liridashës të Afrimit. Para të pranishmëve fillimisht është shpalosur një biografi jetësore e dëshmorit, ku u tha se Afrimi qysh si i ri i ishte bashkuar Ushtrisë Çlirimtare të Kosovës(UÇK) përkrah vëllait të tij në Jezercin legjendar, në vendlindjen e tij, në vendin ku për herë të parë e kishte thithur ajrin e tokës amnore, të cilës nuk ju nda deri në përjetësi.
Kryetari i Ferizajt, Muharrem Svarqa, nën patronatin e të cilit edhe u mbajt ky manifestim, në fjalën e tij theksoi se prej sot, pamja e dëshmorit Afrim Kalanica, do të jetë më shumë e pranishme në mendjet dhe në përfytyrimet e ferizajasve, e jo vetëm të tyre. "Prej sot, shtatorja e Afrim Kalanicës do të bëjë roje në udhëkryqin për Shtime, për të na kujtuar mbi përmasat e flijimeve e përpjekjeve që janë bërë, në mënyrë që ne sot të mund ta kremtojmë lirshëm përvjetorin e Pavarësisë, të punojmë e të mësojmë të lirë, ta bëjmë jetën ashtu siç dimë e siç mundemi", ka thënë Svarqa.
Për më tepër, Svarqa ka shtuar se shtatorja e Afrim Kalanicës dhe lapidarët, bustet e përmendoret e dëshmorëve, martirëve dhe atdhetarëve, në fund të fundit, do të trokasin përjetësisht në ndërgjegjen tonë, për të na përmendur e për të na kujtuar se liria e këti vendi dhe e kësaj toke, është paguar aq shtrenjt, sa nuk është aq e lehtë t’i kthehet shpina e të merret rruga e mërgimit, siç po ndodh aktualisht nga një pjesë e popullatës. "Prandaj detyrimet që i kemi marrë përsipër, për të nderuar e për ta çuar në vend gjakimin e heronjve, dëshmorëve, martirëve e atdhetarëve, na nxjerrin përpara vetëm një rrugë: rrugën e punës, angazhimit e përkushtimit me devotshmëri, për ta ndërtuar të sotmen e të ardhmën më të mirë, për ta vendosur shtetin tonë të ri e të brishtë në themele sa më të forta, për ta bërë jetesën e qytetarëve tanë sa më të lehtë dhe për të ofruar sa më shumë mundësi krijuese për të gjithë", ka thënë kryetari i Ferizajt, Muharrem Svarqa.
Dëshmori i kombit,Afrim Kalanica, u tha se pas luftës së Kosovës nuk ishte ndalur. Aktivitetin luftarak e vazhdoi në radhët e UÇPMB-së, në mbrojtje të tokave të Kosovës Lindore. Pas përfundimit të kësaj lufte ai u zhvendos në Maqedoni, për tu vendosur në zonën e Likovës, por tash me një përvojë më të madhe luftarake, prej një komandanti të rryer, një luftëtari i cili deri në frymën e fundit mbrojti vijen e parë të frontit në Sllupçan, heroizmi i të cilit u bë sinonim i qëndresës dhe guximit edhe për luftëtarët e tjerë. Kryetari i komunës së Likovës, Sadudin Duraku, në fjalën e tij theksoi se pushka e Afrimit bashkoi dy pikat të gjeografisë shqiptare, Jezercin dhe Sllupçanin.
"Afrimi i ofroj këto dy pika të territorit shqiptar që së bashku të jenë në sofrën e lirisë. Ne shokët e tij të gjallë mbesim ende që të kalojmë sfidat që na i kanë lanë amanet dëshmorët. Afrim më nuk ndryshon,ai mbetet ai që është, por ne që kemi mbetur të gjallë duhet t’i kujtojmë gjithmonë ata dhe sakrificën e tyre", theksoi, Duraku.
Ish zv/komandanti i ZO të Nerodimes, gjeneral Imri Ilazi, në fjalën e tij ka spikatur figurën e dëshmorit, duke thënë se Afrimi vjen nga fshati Jezerc që tanimë është bërë i njohur për gjithë shqiptarinë, për të gjitha betejat dhe luftërat e ashpërta për çlirim. "A nuk duhet të krenohen jezercasit dhe ferizajasit, Kosova dhe shqiptaria me trojet e veta. A s’duhet krenohet padyshim Sllupçani i Kumanovës me Afrimin që dha jetën për lirinë e trojeve shqiptare nën emblemën e UÇK-së dhe Ushtrisë Çlirimtare Kombëtare. Ai trasoj rrugën e Ismet Jasharit se si duhet flijuar për atdhe", ka thënë gjeneral Ilazi për të shtuar se këtë sakrificë duhet ta respektojmë të gjithë. "Afrimi me shokë janë korrektuesit me të fuqishme të veprave tona. Nuk duhet lejuar zbrazja e Kosovës. Cili skenar po zbatohet sot në Kosovë, ai i Çubrilloviqit, kush po e ndihmon këtë skenar, kush i ka mbyll sytë dhe veshet në këtë Kosovë, kush po lejon zhgënjimin e shpresës. A jemi dikund ne për të treguar se pse është i vlefshëm ky vend, pse u flijuam dhe u sakrifikuam për këtë vend.A ka burra në këtë vend, unë po them se po, në rast se reflektojmë dhe kthehemi në rrugën e kom bit dhe jemi në shërbim të zhvillimit dhe integrimit tonë, e jo në garën kush për ta gllabruar më shumë këtë vend" ka thënë gjeneral Ilazi, i njohur si komandant Ferri.
Në emër të Shoqatave të Luftës dhe në emër të shokëve të pranishmit i kanë përshëndetur, kryetari i Shoqatës së Familjeve të Dëshmorëve të Luftës, Gafurr Bytyqi dhe Harun Ramadani, ndërsa një portretizim të figurës së dëshmorit i ka bërë edhe komandanti i tij i luftës, Jetullah Qarri i njohur si komandant Guri. Në këtë manifestim nuk kanë munguar edhe një program i pasur kulturo-artistik. Gjatë ditë në Ferizaj është mbajtur edhe një seancë solemne e Kuvendit Komunal të Ferizajt dhe janë bërë homazhe në varrezat e dëshmorëve të UÇK-së, ndërsa në orët e mbrëmjes pritet që të mbahet edhe një koncert festiv i muzikës.
Në përvjetorin e 7 të Pavarësisë së Kosovës, Ferizajt i është kthyer në bronz, dëshmori i kombit, pjesëtari i tri luftërave çlirimtare, Afrim Kalanica, i rënë në Sllupçan të Kumanovës në maj të vitit 2001.
