Që nga orët e hershme të mëngjesit shumë qytetarë nga sheshi i qyteti ja kanë bërë homazhe në varrezat e dëshmorëve të Ushtrisë Çlirimtare të Kosovës.
Ndërsa nën patronatin e kryetarit të Komunës së Ferizajt,është mbajtur një akademi solemne kushtuar kësaj ditë , ku pjesëmarrësit edhe njëherë çmuan lartë kontributin e dëshmorëve për lirinë e atdheut.
Kryesuesi i Kuvendit komunal të Ferizajt, Agim Aliu, me këtë rast ka thënë se në këtë datë para 13 vitesh ushtuan malet e Jezercit nga lufta heroike e djemve dhe bijave të kombit. “Ata nuk u përkulën asnjëherë, ashtu siç nuk u përkulën me shekuj të tërë. Në këtë luftë armiku provoi krejt forcën për të dëshmuar fuqinë e vet, për të shuar rezistencën që kishte marr flakë gjithkund dhe në zemrat e gjithë atyre që ndiheshin shqiptarë e atdhedashës”, ka thënë Aliu, duke shtuar se shembujt që dha Jezerci dhe të gjithë luftëtarët e lirisë që ishin betuar për të luftuar deri në frymën e fundit, dhe shembujt që dhanë dëshmorët e rënë për këtë ditë lavdie i dhanë vulën vendimtare çdo dyshimi apo skepticizmi për epilogun e kësaj lufte. “Nuk bëhej kjo luftë me pahir, as nuk ishte nisur me pahir dhe për këtë brez të artë të Kosovës pak kishte rëndësi edhe çmimi, cilido që të ishte ky”, ka thënë Aliu.
Në këtë akademi u tha se kjo datë, u bë e shënuar edhe për ata që ranë më herët për ideal, por edhe për ata që ranë më pas, duke u bë frymëzim për të gjithë që të punojmë sa më shumë, sa më drejtë, dhe sa më me përkushtim.
Ndërsa Hajdin Abazi, zv/ministër i Kulturës, Rinisë dhe Sportit ka thënë se 13 vjet më parë ndodhi një betejë e ashpër e cila kërkoi sakrifica, kërkoi që njerëzit të flijohen për të treguar vendosmërinë, se populli shqiptarë dhe Kosova nuk e durojnë më robërinë, por janë të gatshëm edhe me çmimin e jetës t’a paguajnë lirinë. “E tani, 13 vjet më pas, ne kemi arritur që këtë ditë ta kthejmë në ditë të festës, sepse të gjithë ata që ranë, dëshmorët e kësaj dite dhe të gjithë dëshmorët e kombit kanë rënë që qytetarët të jenë të lirë”, ka thënë Abazi.
Ndërsa, Gazurr Bytyqi, kryetar i shoqatës së familjeve të dëshmorëve, ka thënë se 28 shtatori është ditë krenarie për të gjithë. “Unë si baba i dëshmorit dhe kryetar i shoqatës së familjeve të dëshmorëve janë shumë krenar sepse kam qene i vetëdijshëm dhe jam ende se për çka ranë dëshmorët. Ata ranë për lirinë, sepse ajo është më e shtrenjtë se jeta”, ka thënë Bytyqi.
Ndryshe, në këtë ditë para 13 viteve forcat e UÇK-së së kësaj ane, u përballën për katër ditë rresht me forcat ushtarake serbe, duke u shkaktuar humbje të mëdha në teknikë dhe njerëz. Në mesin e luftëtarëve të UÇK-së, në fushëbetejë ranë 9 dëshmorë të kombit, të cilët me gjakun e tyre e shkruan historinë më të re të komunës së Ferizajt.
Dita e dëshmorëve të Ferizajt, 28 Shtatori, e cila lidhet me betejën më të lavdishme të UÇK-së së kësaj ane e njohur edhe si "Epopeja e Jezercit ", është shënuar me një varg manifestimesh.
