Në tryezë, veç të tjerëve, qenë të pranishëm Ministri i Punëve të Brendshme Skënder Hyseni, zëvendësministri i po kësaj ministrie Nehat Mustafa, kryetari i Ferizajt Muharrem Svarqa, kryetari i Hanit të Elezit Rufki Suma dhe përfaqësues të këshillave komunale të sigurisë në bashkësi.
Duke e përshëndetur tryezën si një nga masat për luftimin e këtyre dukurive negative, kryetari i Ferizajt, Muharrem Svarqa, vuri në dukje se socializimi i personave që kanë marrë pjesë në luftërat e huaja dhe parandalimi i përhapjes së ekstremizmit e radikalizmit, janë dy nga detyrat kryesore të shoqërisë sonë, për t’u ballafaquar me sukses me këtë problem. Rol të rëndësishëm për realizimin e këtyre detyrave, veç institucioneve, mund të luajnë edhe qytetarët, organizatat joqeveritare dhe shkollat. Komuna e Ferizajt, tha më tej krytari Svarqa, po tregon syçeltësi në këtë aspekt, duke e mbajtur aktiv Këshillin për Siguri në Bashkësi, i cili përbëhet nga përfaqësues të institucioneve, bashkësive fetare, organizatave joqeveritare dhe agjencive të sigurisë. Përmes këtij këshilli ndiqen rrjedhat në çdo aspekt të jetës publike dhe propozohen masa e veprime për t’i korrigjuar parregullsitë, ose dukuritë negative. Megjithatë, ende ka shumë punë, për të konstatuar se po ia dalim mbanë për të pasur një ambient të sigurt, në të cilin do të minimizoheshin dukuritë e përmendura më sipër. Një tryezë si kjo, mund të paraqesë një shembull të përpjekjeve për vetëdijesimin e popullatës që të mos bie pre e këtyre dukurive, u shpreh kryetari i Ferizajt.
Ndërsa Ministri Hyseni, theksoi se qëllimi i tryezave të tilla është që qytetarët dhe e gjithë shoqëria, të marrë rol më proaktiv në luftimin e dukurive si trafikimi, narkomania dhe ekstremizmi. Ai e paraqiti gjendjen në Kosovë si jo të mirë sa i takon trafikimit me qenie njerëzore, ndërkohë që dënimet për vepra të tilla, sipas ministrit Hyseni, ndodh të jenë fare simbolike.
Ministri i brendshëm u shpreh i kënaqur që gjatë 11 muajve të fundit nuk ka pasur asnjë qytetarë të identifikuar që të ketë shkuar për të marrë pjesë në luftërat e huaja. Ai u bëri thirrje bashkësive fetare që të luajnë rolin shumë të rëndësishëm që u takon, për t’ia sqaruar popullatës dëmet që sjell ekstremizmi dhe radikalizmi fetar.
Pjesëmarrësit e tryezës diskutuan për çështje nga më të ndryshmet që lidhen me dukuritë negative në shoqëri. Ata kërkuan përmbajtjen e mediave për të etiketuar njerëzit si ekstremistë, para se gjykatat ta thonë fjalën e tyre, formimin e një task force të mundshme për luftimin e dukurive negative, angazhimi i KKSB-ve, organizatave joqeveritare e shkollave në përpjekje për parandalimin e trafikimit me njerëz, narkomanisë dhe përhapjes së ekstremizmit.
Ministria e Punëve të Brendshme e Kosovës mbajti sot në Ferizaj tryezë diskutimi me kryetarët e komunave të rajonit dhe me këshillat e sigurisë në bashkësi të po këtyre komunave, me temë “Trafikimi me qenie njerëzore, përdorimi i drogave dhe parandalimi i radikalizmit dhe ekstremizmit të dhunshëm që çon në terrorizëm”.
