Kryetari i Komunës së Ferizajt Agim Aliu, me bashkëpunëtorë këtë të enjte ka vizituar nga afër Qendrën e Aftësimeve Profesionale në Ferizajt, me ç’rast është pritur nga drejtori i kësaj qendre Alben Eshrefi.
Me këtë rast numri një i qytetit të Ferizajt Agim Aliu, është njoftuar për të arriturat dhe aktivitete e QAP-it për vitin që sapo lamë pas, si dhe për profesionet e reja që pritet të hapen në këtë qendër.
Aliu ka thënë se puna e cila po behët në këtë qendër është punë jashtëzakonisht e një rëndësi të veçantë, një punë e cila është në harmoni edhe me agjendën e qeveritare të Republikës së Kosovës, por që është edhe në agjendën e Komunës së Ferizajt, sepse agjenda e komunës, por e qeverisë së Republikës së Kosovës është zhvillimi ekonomik.
“Zhvillimi ekonomik nënkupton hapjen e vendeve të reja të punës si dhe plotësimin e resurseve njerëzore dhe sigurisht se nuk mund të bëhet më mirë plotësimi i këtyre potencialeve përveç se njerëzve profesionist dhe unë mendoj se Qendra e Aftësimit Profesional, me modulet që i bëjnë dhe aftësimin e qytetarëve dhe konkretisht të rinisë ferizajase që e bëjnë praktikisht krijojmë njerëz profesionist çfarë në të vërtet i kërkon edhe tregu, i kërkon komuniteti i biznesit”, tha Aliu.
Kryetari i Komunës së Ferizajt, Agim Aliu me këtë rast ka theksuar se edhe komuniteti i biznesit është i interesuar që punësojë qytetarë me profile të ndryshme në të cilat ata kërkojnë.
“E veçanta është se ne para disa ditësh kemi vizituar komunitetin e biznesit dhe vazhdimisht kemi pasur kërkesa të ndryshme për profile të ndryshme që sikur mungojnë te qytetarët tanë, të rinisë tonë për të plotësuar kapacitetet e këtyre bizneseve dhe kjo është arsye që kemi ardh këtu, në një qendër e cila bënë aftësimin e këtyre njerëzve në mënyrë që të jenë partner me komunitetin e biznesit për të realizuar edhe ambiciet e komunitetit të biznesit me profile të caktuar kjo është njëra nga hapat. Ju e dini që jemi duke ndërtuar edhe Qendrën e Kompetencës e cila do të ketë profile të tjera, e gjithë kjo është në kuadër të asaj agjende që të krijojmë profile, profesione të reja që tregu i punës t’i absorboj më lehtë. Është një kërkesë e komunitetit të biznesit se nuk ka profile të caktuara për të absorbuar fuqi punëtore dhe nganjëherë dhe vinë në siklet për profile të caktuar, prandaj është mu kjo qendër e cila mund të ndihmojë që të hiqet ky siklet për profile të ndryshme”, ka pohuar Aliu.
Ndërkaq drejtori i Qendrës për Aftësime Profesionale në Ferizaj Alben Eshrefi, është shprehur tejet i kënaqur me vizitën që bëri Kryetari i Komunës së Ferizajt, Agim Aliu.
Drejtori Eshrefi ka thënë se në Qendrën e Aftësimeve Profesionale në Ferizaj, janë hapur edhe dy profesione të reja siç është ai i hotelerisë dhe kuzhinerisë. “Kryetarin gjithashtu e informova edhe me mundësitë e implementimit të skemës nga Komisioni Evropian dhe UNDP-ja, të cilat fillojnë të implementohet nga muaji shkurt, me ç’rast 250 punëkërkues nga regjioni i Ferizajt, do të përfitojnë nga mundësitë e skemave të trajnimit në punë”, tha Eshrefi.
Ai ka theksuar se kandidatët e kësaj qendre në vitin 2012 kanë arritur rezultate të kënaqshme
. “Ata të cilët janë trajnuar dhe certifikuar 60 për qind e atyre kanë gjete punë në sektorin privat dhe publik. Qendra për Aftësime Profesionale gjithmonë merr parasysh sugjerimet e komunës, sepse komuna e ka një përfytyrim të saktë se cili biznes ose cili sektor po zhvillohet ekonomikisht dhe si rezultat i asaj kërkese ne ju qasemi dhe hapim profesione të reja, gjithmonë jemi në komunikimi të ngushtë të drejtpërdrejt qoftë me zyrën e kryetarit qoftë me zyrën e zhvillimit ekonomik në komunën e Ferizajt”, është shprehur ai.
Me këtë rast u bë thirrje të gjithë atyre të interesuarve që të shfrytëzojnë mundësinë që përmes Qendrës për Aftësime Profesionale të aftësohen në profile të ndryshme dhe atëherë e kanë mundësinë më të lehtë që të gjejnë vendet e tyre të punës.
U bë e ditur se Komuna e Ferizajt do të jetë mbështetëse e një programi të tillë, sepse duke mbështetur një program të tillë, bëhet një shërbimin më i mirë që mund të bëjmë për rininë dhe qytetarët tanë ferizajas në mënyrë që ata të kenë mundësinë që sa më lehtë të gjejnë vende të punës dhe të jenë më profesional për ekonominë e tregut që për çdo ditë është më e hapur për të gjithë qytetarët.
Qendra për Aftësime Profesionale në Ferizaj, të rinjtë nga Ferizaj po i përgatit për tregun e punës.
