Në hapje të këtij debati SadeteTërnava -Osmani nga misioni i OSBE-së, ka theksuar se ky takim ka për qëllim t’i rris kapacitetet mbikëqyrëse të Kuvendit Komunal dhe të Komiteteve karshi ekzekutivit të komunës.
Këtë takim e ka përshëndetur edhe drejtori i OSBE-së për regjionin lindje, Ulrike Bifar, i cili ka vënë në dukje se legjislativi, ekzekutivi dhe gjykatat janë shtyllat kryesore të një shoqërie të pushtetit që funksionojnë ndaras por që kanë rëndësi të veçantë për qytetarët.
Edhe zyrtarët komunal kanë fol për këtë relacion duke vënë në dukje përparësitë dhe të metat që kanë përcjellë, ndërsa është folur edhe për pjesëmarrjen dhe mospjesëmarrjen e publikut në debate duke vënë theksin në indiferencën e qytetarëve karshi këtyre debateve.
Drejtori i Drejtorisë për Shëndetësi dhe Mirëqenje Sociala, Vesel Zhinipotoku, ka thënë se komuna e Ferizajt edhepse ka përdorur të gjitha mekanizmat e informimit të qytetarëve nuk është e kënaqur me pjesëmarrjen e publikut, sipas tij në shumicën e takimeve edhe pjesëmarrja e femrave ka qenë e vogël dhe jo e kënaqshme.
"Me qëllim të ngritjes së transparencës në komunë e Ferizajt, e dini se të gjitha seancat e KK-së janë seanca të hapura dhe transmetohen drejtpërdrejt, janë xhirimet integrale dhe të gjitha vendimet e komunës janë të publikuar në veb faqen e komunës. Qëllimi kryesor është që qytetarët të informohen rreth punës së kuvendit dhe vendimet e tij." ka thënë Zhinipotoku.
Kryesuesi i Kuvendit Komunal, Xhavit Zariqi ka thënë se qytetarët janë të zhgënjyer nga fakti se nga takimet publike kërkesat e tyre nuk merren parasysh dhe për këtë qëllim ata hezitojnë të vijnë dhe të humbin kohë.
"Arsyja kryesore se pse qytetarët nuk marrin pjesë në debate qëndron në faktin se kërkesat e tyre në takimet publike nuk merren parasysh dhe injorohen. Vendimet ligjore përmbushën dhe kështu kalojnë, por është për të ardhur keq, kur në diksutimin publik për buxhetin vjen vetëm një qytetarë, kjo është situatë që nuk donë koment’ ka thënë Zariqi.
Edhe përfaqësues të shoqërisë civile kanë folur për raportin duke kërkuar ndryshimin e praktikave të deritashme që do të qonin në fuqizimin e legjislativit dhe në kontrollin më rigoroz të ekzekutivit.
Samir Reka nga INPO ka thënë se roli i Kuvendit komunal jo vetëm në Ferizaj, është shumë i zbehtë, nuk ka ndonjë ndikim të drejtpërdrejt. Ai ka thënë se kryetarët e komunave ndonëse të zgjedhur drejtpërdrejt nga vota e qytetarëve nuk e kanë pasur ndikimin e pritur, duke na sjell në situatën që në të ardhmen të bëjmë një monitorim të rregullt të punës së kuvendit.
Misioni i OSBE-së në Kosovë të enjten ka ftuar në një takim përfaqësuesit e komunës së Ferizajt dhe organizatave joqeveritare për të diskutuar rreth përmirësimit të rolit mbikëqyrës të legjislativit ndaj ekzekutivit.
