Sipas zëdhënësit të Komitetit për Gatishmëri Emergjente Bashkim Hysenit, gjatë tërë javës komuna ka zhvilluar disa aktivitete dhe konsideron se gjendja mund të kthehet në të mëparshmën, jo në normalitet të plotë, por institucionet do të funksionojnë sipas dinamikës dhe detyrave të veta. “Pas mbledhjes së Këshillit Komunal për Siguri në Bashkësi, kryetari ka mbajtur takime të rregullta me bordin e drejtorëve ku është raportuar mbi bazat ditore për të gjitha angazhimet që kanë pas varësisht nga segmentet e caktuara , përveç Drejtorisë për Shërbimet Publike dhe Emergjencave”, ka thënë Hyseni , duke theksuar se kryetari i komunës ka mbajtur edhe takime më të gjitha institucionet e tjera përcjellëse të involvuara në këtë gjendje emergjente. “Janë mbajtur takime me policinë, kompaninë “Pastërtia”, me institucionet shëndetësore. Po ashtu janë mbajtur takime me edhe përfaqësues të këshillit të fshatrave bashkë me disa drejtorë dhe është informuar për së afërmi për gjendjen në terren dhe njëkohësisht janë marr instruksione dhe informimi na ka shërbyer shumë në nivel që të veprojmë në segmente të caktuara”, tha drejtori Hyseni.
Nga ana tjetër edhe drejtori i Drejtorisë së Shërbimeve Publike dhe Emergjencës, Ibrahim Hyseni, ka theksuar se tashmë të gjitha rrugët janë të qarkullueshme, përveç asaj të fshatit Burrnik që po bëhen përpjekje maksimale që të lirohet. “Kemi pa që vërtet shumica e rrugëve janë të kalueshme dhe nuk kemi pasur ndonjë kërkesë të veçantë. Mund të them se të gjitha rrugët për në fshatra janë të qarkullueshme, përveç rrugës së fshatit Burrnik, ku kemi tentuar edhe dje me përfaqësuesit e KFOR-it grek që të lirojmë atë rrugë, mirëpo ata nuk kanë arritur të zhbllokojnë, ndërsa sot ndërmarrja “Pastërtia” ka marr një aksion edhe me eskavator e vet dhe me fuqitë e veta që të bëjë përpjekje që të lirohet “, tha drejtori Hyseni.
Në këtë konferencë për gazetarë edhe vlerësuar lart edhe kontributi i të gjithëve që kanë bërë gjithçka për të ndihmuar familjet e shumta në komunën e Ferizajt.
Në bazë të dhënave që tashmë janë nga terreni dhe mbi bazën e gjendjes faktike të krejt angazhimit që ka pasur këtë javë Komiteti për Gatishmëri Emergjente, shihet se situatë e rëndë pas të reshurave të fundit është përmirësuar dukshëm.
