Drejtori i Drejtorisë për Infrastrukturë, Ardian Ferizi, ka thënë se prej vitit 2010 është punuar në mënyrë intenzive në çështjen e trajtimit të ujërave të zeza. Sipas tij tashmë ekziston një plan intensiv strategjik i investimeve për komunën e Ferizajt për pesë vitet e ardhshme 2010-2015 dhe në bazë të kësaj strategjie po veprohet në këtë drejtim.
"Ne e kemi parë të udhës që si fazë emergjente të heqim kanalizimet nga rruga dhe ti dërgojmë në afërsi të lumejve dhe të ndërtojmë gropa septike dhe puse filtruese në mënyrë që të hiqet ai kundërmim në fshatra. Kjo ka qenë faza e parë. Faza e dytë është menduar që të ndërtohen kolektor të cilët do t’i dërgojnë ujërat e zeza deri në pikat të cilat ne i kemi caktue për impiante" ka thënë Ferizi.
Bëhet e ditur se tashmë janë identifikuar dy vende në të cilat është caktuar që të ndërtohen impiantet.
"Njëri është paraparë që të ngritet në dalje të fshatit Gurëz, në drejtim të Kaçanikut dhe tjetri në fshatin Bablak në kufi me Lipjanin. Është menduar, që ai që do të ngritet në Gurëz do të bartë afro 65% të të gjithë kanalizimeve të qytetit, ndërsa ai i Bablakut përveç fshatrave të komunës do të merr edhe kanalizimet e komunës së Shtimes. I kemi edhe katër fshatra tjerë si Sojeva, Mirosala, Zllatari dhe Dardania të cilat shkojnë në drejtim të Sllatinës dhe kështu së bashku me komunën e Vitisë do të planifikojmë ti trajtojmë ujërat e zeza" ka shtuar Ferizi.
Por është një zonë e veçantë në komunën e Ferizajt e cila për shkak të pozitës do të trajtohet me një impiant të veçantë, ngritja e secilit pritet që nis sivjet. Drejtori Ferizi, shpjegon se është një pjesë e madhe e fshatit Komogllavë që nuk lidhet me asnjërën prej këtyre dhe aty e kemi bërë një zgjidhje që të bëhet një impiant vetëm për këtë vend.
"Ky impiant është tenderue së bashku me Qeverinë Zvicrane dhe presim që sivjet të fillojmë punimet" ka pohuar Ferizi.
Sipas zyrtarëve në muajin qershor Komisioni Evropian (KE) ka nis ti bëj matjet e duhura sa i përket trajtimit të ujerave të zeza në territorin e komunës së Ferizajt dhe deri në fund të nëntorit do të prezantohet strategjia për prezantimin e projekteve të kësaj natyre. Mësohet se tashmë Komisioni Evropian e ka angazhuar një kompani për ta krye fizibilitetin e ujerave të zeza në komunë, konkretisht për ta hartuar një dizajn preliminar.
"Ata i kanë filluar punimet, jemi duke i bërë matjet. Ne presim që deri në fund të nëntorit ta prezantojmë këtë dizajn. Me këtë hapet rruga që gjatë viti 2014 dhe 2015 tu hapet rrugë edhe investimeve nga donacionet e KE-së" ka thënë në fund drejtori Ardian Ferizi.
Ndryshe këto janë projekte madhore thonë zyrtarët, që bazuar në planifikimet pritet që nga viti 2014 të filloi ndërtimi i impiantit të parë.
Trajtimi i ujerave të zeza që do të evitonte rrjedhjet dhe kundërmimin e rëndë në komunën e Ferizajt ka filluar që nga viti 2010. Zyrtarët komunal kanë thënë të marten se pas përmbylljes së fazës së parë emergjente, hapjen e gropave septike në vendet e caktuara dhe derdhjet e tyre në lumenjë, ka pasuar faza e dytë e ndërtimit të kolektorëve në zonat e caktuara që do të evitonin rrjedhën e kanalizimeve.
