Drejtues të drejtorisë komunale të Arsimit në Ferizaj, janë shprehur se përmes këtij konkursi synohet të plotësohen me kuadro të diplomuar në ato shkolla , në të cilat deri me tani kanë punuar mësimdhënës të cilët nuk kanë pasur ato drejtime të nevojshme. Drejtori i Arsimit, Agim Berishës është shprehur se bëhet fjalë për një konkurs të rregullt. Në të cilin do të pranohen vetëm mësimdhënës të diplomuar, përkatësisht kuadri me shkollim adekuat univeristar, përderisa ka lënë të hapur mundësinë që në mungesë të aplikuesve me diploma, në afatin plotësues të plotësohen me kuadro të padiplomuar, në radhë të parë ata që kanë punuar më herët dhe që kanë treguar performancë të mirë në punë.Konkursi është hapur konform numrit të lëndëve në të cilat kanë nevojë një numër i konsiderueshëm i shkollave. "Mund të them se edhe në këtë konkurs dominojnë Gjuha angleze, Matematika, Fizika, Teknologjia Informative, etj. këto janë më të kërkuara. Janë profile që i mungojnë arsimit në komunën e Ferizajt dhe synim yni është që të kemi kuadër të diplomuar" ka thënë Berisha.Ndërsa sa i përket kuadrove të diplomuar të gjuhëve të huaja siç është gjuha angleze, ai ka thënë se në shkolla fillore nuk ka kuadrë të padiplomuar, përderisa mungesa ndihet në shkolla të mesme. Sipas Berishës shkollat kanë nevojëtë mëdha dhe emergjente për matematikë apo fizikë, kjo për faktin se ka pak studentë që i studiojnë këto lëndë mësimore shumë të kërkueshme.
"Këto kanë qenë të theksuara edhe viteve tjera, por ne jemi duke u munduar të gjejmë mënyra stimulimi për studentë. Ne kemi aprovuar rregulloren në Kuvend, për të stipenduar ata studentë që studiojnë në këto drejtime. Ne kemi kuadro nga lëndë tjera më bollëk, madje shumë prej tyre nuk po arrijnë me vite të krijojnë marrëdhënie pune. Prandaj, përqëndrimi ynë është të joshin të rinjtë për të studiuar lëndët më deficitare" ka thënë Berisha.
Sipas të dhënave të DKA-s, deri në 80 për qind zë kuadri i diplomuar në shkollat e Ferizajt, përderisa mbi 20 për qind zë vend ai i padiplomuar, që shikuar nga shumë këndvështrime nuk është gjendje alarmante.
"Të shohim këtë vit, shpresoj që kjo gjendje të shkojë drejt përmirësimit. Besoj se do të ketë ngritje për të mirë" ka thënë drejtori i DKA-s, Agim Berisha, mbështetur në të dhënat se për çdo vit janë duke diplomuar gjenerata të reja, të cilat do të përmbushin objektivat e intitucioneve për plotësim të nevojave me kuadër.
Është shpallur konkursi i rregullt për kuadro të reja mësimor , nga drejtoria komunale e Arsimit për vitin e ardhshëm shkollor për tri nivele.
