Komisioni Komunal Aksionar i Ndërmarrjes Publike Lokale (NPL) "Stacioni i Autobusëve" i formuar në njërën prej seancave të fundit të Kuvendit të Komunal të Ferizajt, ka marrë vendim për shkarkimin e Bordit të drejtorëve të kësaj ndërmarrje, të formuar vitin e kaluar, për të shpallur konkursin për themelimin e Bordit të ri të drejtorëve. Gafurr Imeri, anëtar i këtij komisioni ka thënë se komisioni ka shqyrtuar dokumentacionin që i është ofruar dhe gjetjet tregojnë se në këtë ndërmarrje ka parregullsi të mëdha dhe veprime kundërligjore, gjë që kanë shtyrë për të bërë ndryshimet dhe për të filluar me zgjidhjen e problemeve në këtë ndërmarrje që sipas tij nuk janë të pakta.
Imeri ka thënë se është konstatuar se komisioni i përbërjes së kaluar dhe Bordi i Drejtorëve, nuk kanë pasur një koordinim të punëve, ndaj nuk kanë marrë veprime sipas kompetencave, duke u treguar joserioz. Por Imeri ka shpalosur edhe defekte tjera, duke i vlerësuar si kundërligjore, siç është mungesa e statutit të ndërmarrjes dhe e rregulloreve të brendshme, si dhe afarizmi me llogari rrjedhëse të bllokuar me vite të tëra, që ka mundësuar në mënyrë të kundërligjshme punën me para të gatshme.
"NPL kishte punuar me mjete-para të gatshme, apo siç thuhet kesh", ka thënë Imeri, duke e vlerësuar këtë të jetë shkelje drastike e ligjit.
Ndër tjerash, ai ka thënë se raporti i punës që i është ofruar komisionit të tashëm të aksionarëve është i padetajuar dhe jep të kuptohet se ka pasur mundësi të keqpërdorimeve financiare të mjeteve.
"Në NPL Stacioni i Autobusëve nuk është bërë asnjë investim dhe nuk është ndërmarrë asnjë veprim për investime. Në bazë të evidencave të kontabilitetit, kjo ndërmarrje ka obligime në lartësi prej 1.2 milon euro", ka thënë Imeri, ndërsa ka shtuar se bëhet fjalë për një detyrim financiar ndaj ATK-së.
Në Stacionin e Autobusëve në Ferizaj, sipas anëtarit të këtij komisioni, në këtë ndërmarrje pagë kanë gëzuar 20 punëtorë, pa llogaritur edhe anëtarët e bordit. Sipas të dhënave të Imerit, drejtuesit e kësaj ndërmarrje kanë marrë paga mesatarisht 1 mijë euro, ndërsa pagat minimale kanë qenë 300 euro.
I pyetur se shkarkimi i anëtarëve të Bordit a është legjitim, Imeri ka thënë se tashmë janë shkarkuar dhe janë krijuar mundësitë e zgjedhjes së bordit tjetër, ndërsa gjithkush ka të drejtën e ankesës. Ai ka pohuar se me këtë veprime do të fillojë zgjidhja e problemeve në këtë ndërmarrje.
Për shumë parregullsi e veprime kundërligjore
