Në këtë aktivitet mori pjesë kryetari i komunës së Ferizajt, Muharrem Svarqa, drejtoresha e shërbimeve publike, Mimoza Fazliu, drejtoresha e çerdhes Arta Tahiri si dhe drejtues të Bechtel & Enka”.
Kryetari i komunës së Ferizajt Muharrem Svarqa vlerësoi se në këtë mënyrë po filloj një kujdes me i mirë për ambientet e frekuentuara siç janë kopshtet e fëmijëve.
“Është mirë që pishat që po mbillen sot, në mënyrë simbolike po hapin rrugë dhe mundësi edhe investimeve komunale, sepse në mbledhjen e djeshme të Kuvendit të Komunës kemi arrit që në rishikimin e buxhetit ta bëjmë edhe rregullimin e oborrit të këtij kopshti, ku kemi ndarë shumë mbi 14 mijë euro, ku do të bëhet edhe rregullimi i këndit të fëmijëve projekt që është hartuar nga Zyra projektuese e komunës së Ferizajt. Ne po ashtu do t’i kushtojmë rëndësi që të kemi sa më shumë hapësirave të reja të gjelbëruara, por edhe kopshte të tjera për fëmijë”, ka thënë Svarqa.
Ndërkaq udhëheqja e çerdhes është shprehur e kënaqur edhe me fitimin e një projekti për rregullimin e oborrit të çerdhes në vlerë prej 14 mijë eurove që u votua dje në mbledhjen e Kuvendit komunal.
“Mbjellja e këtyre pishave po na jep mundësi një rifreskim të ajrit, kjo është një mundësi e mirë që tani fëmijët të rriten shëndetshëm edhe jashtë ambientit ku rrinë brenda. Unë falënderojë “Bechtel & Enka” dhe drejtoreshën e shërbimeve publike Mimoza Fazliun e cila i dha mundësinë kopshtin tonë që të ketë këtë ambient edhe jashtë”, ka thënë Tahiri.
Përfaqësues të kompanisë “Bechtel & Enka” të cilët dhuruan këtë donacion dhe mbollën pishat thanë se këtë aktivitet po e realizojnë me kënaqësi si ndihmë për komunitetin.
” Jemi të ngazëllyer që na është dhënë mundësia që për ditën e mjedisit mund të kontribuojmë me mbjelljen e 40 pishave në oborrin e këtij kopshti. Qëllimi jonë është që kudo që të jemi të ofrojmë ndihmën tonë aq sa mundemi. Ne së shpejti do të fillojmë edhe me punësimin e njerëzve nga rajoni juaj në kuadër të punëve të autostradës për në Shkup”.
Kurse shoqëria civile e Ferizajt edhe më tutje po tregohet kritike ndaj vëmendjes institucionale për mjedisin. Kenan Gashi nga rrjeti i OJQ-ve AVONET thotë se duhet të ketë ashpërsim të dënimeve për ndotësit e mjedisit.
Në oborrin e çerdhes së re në Lagjen e Re, sot janë mbjellur 40 pisha për të shënuar simbolikisht ditën botërore të mjedisit.
