Me rastin e ditës ndërkombëtare të personave të moshuar, Handikos në Ferizaj, në bashkëpunim me organizatën greke KMOP, këtë të hënë kanë mbajtur një tryezë me temën “Situata e personave të moshuar në Kosovë”. Në këtë tryezë merrnin pjesë përfaqësues të Bashkimit Evropian, përfaqësues të Ministrisë së Punës dhe Mirëqenies Sociale, Drejtues Komunal si dhe persona të moshuar nga qyteti i Ferizajt.
Në hapjen e kësaj tryeze Xhemile Murseli nga Handikos, ka thënë se kjo tryezë po zhvillohet edhe në kuadër të projektit “Përkujdesja dhe Mbështetja e Integruar për Personat më Aftësi të Kufizuara dhe të Moshuar: projekt pilot drejt kalimit në shërbime të bazuara në bashkësi”, i cili financohet nga Zyra e Bashkimit Evropian në Kosovë dhe Komuna e Ferizajt.
“Projekti synon ofrimin e shërbimeve të bazuara në bashkësi për persona të moshuar dhe shërbimeve në shtëpi për të rritur me aftësi të kufizuara. Projekti ka si qëllim të kontribuoj në mirëqenien, fuqizimin dhe internimin social të personave të moshuar dhe atyre me aftësi të kufizuara në shoqëri”, tha Murseli.
Ndërkaq përfaqësuesja e Bashkimit Evropian e cila ishte pjesëmarrëse në këtë tryezë Sophia Berman, këtë tryezë e ka quajtur të një rëndësie shumë të madhe, për shkak se po flitet për personat të cilët duhet të kenë një trajtim shumë më të mirë.
Nga ana tjetër përfaqësuesi i Ministrisë së Punës dhe Mirëqenies Muhamet Gjocaj, ka thënë se përkujdesja e personave të moshuar në Kosovë, ka qenë një traditë shumë e mirë.
“ Është një diçka e mirë që dua të potencoj sot këtu , kujdesi ndaj personave të moshuar dhe fëmijëve më aftësi të kufizuara është jashtëzakonisht një traditë e mirë në Kosovë dhe vazhdon të jetë. Në fakt të gjithë jemi dëshmitar se shumica e të moshuarve jetojnë nëpër familje në shtëpitë e tyre më fëmijët e tyre me njerëz të afërt, ndërsa në vende të tjera të Evropës ndoshta ky solidaritet nuk është më”, tha Gjocaj.
Edhe Drejtori i Drejtorisë së Shëndetësisë dhe Mirëqenies Sociale në Ferizaj, Vesel Zhinipotoku, ka thënë se Komuna jonë çdo here ka qenë ë angazhuar që t’ju del në ndihmë katyre kategorive.
“Qëllimi ka qenë dhe do të mbetet që këto kategori të kenë trajtim të mirë. Që ky shërbim të jetë më cilësor dhe të jetë në përputhjet me standardet evropiane, në mënyrë që të moshuarit tanë të mos e ndjen veten të margjinalizuar “, ka thënë Zhinopotoku.
Në fund të këtij takimi pjesëmarrësit kanë diskutuar gjerë e gjatë lidhur edhe me kushtet e vështira si dhe për pensionet shumë të ulëta të të moshuarve në Kosovë.
Dita ndërkombëtare e personave të moshuar këtë të martë është shënuar edhe në qytetin e Ferizajt.
