Sipas të parit të Arsimit në Ferizaj, Agim Berishës secili rekomandim ka rëndësinë e vet. Ai tha se e gjithë kjo po bëhet për ngritjen e disiplinës dhe ngritjen së cilësisë së arsimit në përgjithësi në procesin edukativo –arsimor.” Në mënyrë të veçantë do të vështrohen – përcillen orët e humbura (mungesat e mësimdhënësve), ku për humbjen e orëve mësimore (mosrealizimin e tyre) të pasojnë masat adekuate, nëse brenda muajit përsëriten mungesat e paarsyeshme nga i njëjti mësimdhënës, kërkohet shqyrtim i veçantë dhe masa rigoroze. Për vonesë deri në 5 minuta, të bëhet ndalesa për vlerën e një ore ,për mungesë (mosmbajtje të 2 e më tepër orëve) t’u hiqet mëditja” ka thënë Berisha , ndërkaq ka shtuar se ata mësimdhënës që e shënojnë orën pa e mbajtur drejtpërdrejt shkojnë në komision disiplinor.” Për çdo muaj drejtorët duhet të sjellin raport për mungesat e mësimdhënësve, drejtorët e shkollave do të përcjellin me pedantëri dhe saktësi realizimin e planprogrameve mësimore nga mësimdhënësit dhe të qëndrojnë tërë kohën e orarit të punës në shkollë ,drejtorët duhet të hospitojnë në orët mësimore të arsimtarëve, drejtorët e shkollave janë të obliguar që brenda javës të hospitojnë nga 2 orë mësimore, ndërsa zëvendësdrejtorët nga 3 orë mësimore. Në shkollat ku ka zëvendësdrejtor mbikëqyrja prej organeve udhëheqëse të jetë tërë ditore, në orar të caktuar, drejtorët e shkollave duhet të kërkojnë me shkrim ndihmën e Drejtorisë së Arsimit për inspektim të mësimdhënësve te të cilët konstatohet joseriozitet i duhur në punë”, ka potencuar drejtori Berisha. Ai ka theksuar faktin se asnjë mësimdhënës pa shkoqitjen e planprogrameve dhe dorëzimin e tyre, te drejtori i shkollës, asnjë mësimdhënës s’mundet ta fillojë punën, ndërkaq ka bërë të ditur se mësimit praktik t’i kushtohet rëndësi e veçantë, sepse ai do të përcillet edhe nga jashtë, pikërisht nga sektori i inspektimit. Zyrtarë komunal të Arsimit me këtë rast kanë vërë në dukje se vlerësimi i brendshëm të organizohet në bashkëpunim me përfaqësuesit e Tregut të Punës (sipas Ligjit për Arsimin profesional).”Nëse tri vite radhazi suksesi i lëndës mbetet nën 50 % atëherë vëhet në pikëpyetje vazhdimi i kontratës së punës, për çdo mangësi dhe lëshim që vërejnë, drejtorët duhet ta shtrojnë si problem në kuadër të aktivit profesional, në mënyrë që të hulumtohet zgjidhja dhe për mosfunksionimin e aktiveve profesionale përgjegjësia bie mbi drejtorët e shkollave. Kujdestaria e ditës të realizohet si duhet, sepse ora e kujdestarisë së ditës hynë në 40 orëshin e normës së çdo mësimdhënësit dhe moskryerja e kujdestarisë së ditës duhet të sanksionohet me heqje të mëditjes etj” janë shprehur zyrtarët arsimor.
Me këtë rast drejtori i Drejtorisë së Arsimit në Ferizaj, Agim Berisha ka thënë se në bazë të këtij rekomandimi i cili do të hy në fuqi që nga 1 shtatori i këtij viti, një kujdes mjaft i madh do t’i kushtohet edhe evidentimit të mungesave të nxënësve, ndërsa ata mësimdhënës të cilët nuk i kushtojnë rëndësi kësaj forme të evidencimit do të shkojnë në përgjegjësi të tyre.”Nxënësi që kalon me fletëkalim nga një shkollë në shkollën tjetër, drejtori i asaj shkolle ka obligim ta kthejë raportin me shkrim tek shkolla e mëparshme e atij nxënësi, nxënësi nuk mund ta kalojë klasën e pestë pa i përvetësuar njohuritë elementare nga planprogrami i paraparë, nëse ai është i aftë në rrafshin psikofizik , ndërsa zbulimi i rasteve të tilla përgjegjësia bie mbi mësuesin e klasës. Mbi 32 mungesa në shkollat e mesme, nxënësi largohet nga procesi edukativo – arsimor” , ka thënë Berisha , duke bërë të ditur se vitin që lam pas , në këtë rrafsh ka pasur mangësi , ku kishte raste që në shkollat e komunës së Ferizajt, një nxënës kishte arritur mbi 85 mungesa të paarsyeshme dhe nuk ishte ndërmarr asgjë. “Rastet e tilla i nxisin edhe nxënësit tjerë për të munguar nga orët e mësimit,nuk përfillej qëndrimi i njëjtë në të gjitha shkollat, prandaj duhet pasur kujdes. Toleranca e pa kufi, po na kthehet bumerang dhe shprehet me vrazhdësi të madhe në procesin edukativo – arsimor, në sukses e në sjellje të nxënësve edhe në raport ndaj mësimdhënësve dhe moshatarëve të tyre , këto mungesa, ky mosseriozitet është shprehur dukshëm negativisht në suksesin e vitit shkollor veçanërisht këto janë reflektuar në testin e maturës, por edhe në atë të arritshmërisë”, ka potencuar Berisha.
Sipas drejtorit të Drejtorisë Komunale të Arsimit në Ferizaj, Agim Berishës edhe testi i arritshmërisë dhe testi i maturës nuk janë në harmoni me suksesin e vitit shkollor. Ai ka thënë se testit të maturës dhe testit të arritshmërisë kërkohet t’i kushtohet një rëndësi e veçantë , dhe duhet të mbahen orë plotësuese në bazë të planit orientues të hartuar nga MASHT-i.”Kriteri i vlerësimit është i patolerueshëm dallimi tejet i theksuar në mes të dy semestrave, e në veçanti kjo dukuri është e shprehur në shkollat e mesme. Në shkollat e mesme duhet një qëndrim më rigoroz sa i përket mbajtjes së uniformës nga ana e nxënësve. Është e qartë se me mësim zgjedhor nuk mund të themelohet marrëdhënie pune , nuk mund të ketë kontratë dhe në të gjitha ato shkolla ku hetohet një dukuri e tillë, përgjegjësia bie mbi drejtorin e asaj shkolle”, kanë bërë të ditur zyrtarët të arsimit në Ferizajt.
Në rekomandimet e përgatitur për shkollat e komunës së Ferizajt, drejtoria e Arsimit, është theksuar se nga klasa e parë deri në të pestën më përjashtim të gjuhës angleze dihet se do të jetë një mësues një klasë. Ndërsa është theksuar fakti se pushimet mjekësore qoftë për nxënës , apo personel nuk janë valide nga ordinancat private , por vetëm nga mjeku i Mjekësisë Familjare. “Mësimdhënësit janë të obliguar që të përgatiten me shkrim për organizimin e orëve mësimore dhe të kenë fletoret e punës, për mësimdhënësit e trajnuar (në MKLSH dhe MNQ) aplikimi i teknikave dhe metodave bashkëkohore të mësimdhënies dhe nxënies të jenë të obligueshme. Shkolla duhet të bëjë përpjekje që këtyre mësimdhënësve t’iu sigurohen materiale dhe mjetet e duhura të domosdoshme, aq sa është e mundshme për rrethanat tona , të kenë kujdes të veçantë te disa lëndë si në edukatë fizike, art figurativ, kulturë muzikore etj, ku orët nuk mbahen sipas planprogramit të caktuar nga MASHT-i , gjegjësisht, tjetër shkruhet në ditar e tjetër punohet brenda orës nuk lidhet teoria me praktikë” , ka thënë Berisha.
Drejtues Komunal të Arsimit ,kanë thënë se nëse drejtorët dhe mësimdhënësit nuk dëshirojnë t’ju përmbahen këtyre rregullave , ata nuk do të jenë pjesë e atij personeli.
Drejtoria Komunale e Arsimit në Ferizaj, u ka paraqitur rekomandimet të gjitha shkollave të komunës sonë për ngritjën e diciplinës dhe ngritjës së cilësisë së arsimit në përgjithësi në procesin edukativo-arsimor.
