Nuk munguan edhe evokimet e ish- luftëtarëve të UÇK-se, të cilët sollen momente kujtimi nga kjo ditë. Gazmend Bytyçi, njëri nga pjesëtarët e njësitit të UÇK-së, që në këtë ditë hyri triumfalisht në qytet, tha se është i mbërthyer nga emocione të shumta, sa herë kujton atë detaj shumë të rëndësishëm të jetës së tij.
"Janë momente të papërsëritshme, që nuk harrohen. Ndoshta jemi me fat që i kemi takuar asaj gjenerate. Janë moment kujtimi me emocione edhe krenarie. Ne nuk erdhëm vetëm këtu, pasi lam pas vete në pozicione shokët tanë, eshtrat e shokëve tanë, por megjithatë ne erdhëm me frymën e tyre, me lirinë" ka thënë Bytyçi.
Edhe për Elmi Reçicen, njërin prej komandatëve të UÇK-së, Elmi Reçica, tash deputet i Kuvendit të Kosovës, qershori shënon muajin e krenarisë kombëtare."Mendoj se lavdia u takon të rënëve për këtë ditë, por edhe gjithë të rënëve të angazhuar për lirinë dhe pavarësinë e këtij vendi, pavarësisht formës, mënyrës dhe metodave që kanë përdorur për të arritur këtu, që nga refuzimi i shtetit serb e deri tek rënia për vendin e tyre" ka thënë Reçica.
Për nderë të kësaj dite nën patronazhin e kryetarit të komunës është mbajtur edhe një akademi solemne, me ç’rast kryetari i Ferizajt, Bajrush Xhemaili ka vënë në dukje se Ferizaj është shndëruar në një qytet të vlerave dhe arritjeve të mëdha, por për të arritur në këtë ditë, tha se është dashur të bëhet shumë punë, shumë sakrificë.
"Në heroizmin e plagët e secilit luftëtar, në gjakun e secilit dëshmorë dhe në vuajtjet e secilit martir të vrarë, burgosur, dhunuar, poshtëruar e masakruar, liria e një populli si nocion, në formë kryengritëse doli nga ngujimi shekullor në sirtarët e kancelarive diplomatike, për t`u afishuar në sytë e secilit qytetar të botës" ka thënë Xhemaili.
"Sot, 12 vjet pas, ne jemi këtu, gjallë dhe të sigurt në rrugën e arrtijeve të reja. Jemi të ndërgjegjshëm për sakrificën e brezave dhe për solidarizimin me çështjen tonë të miqve ndërkombëtarë euro-atlantikë, me në krye SHBA-në. Poashtu, jemi të vetëdijshëm që sfidat që na presin nuk janë të lehta, por gjithsesi janë të përballueshme. Ne besojmë në mundësitë tona, në energjinë tonë dhe cilat do të jenë pengesat, do t`i tejkalojmë dhe do të rreshtohemi në radhët e popujve, të cilët nivelin e arritjeve e kanë shndërruar jo në detyrë, por në mentalitet" ka thënë kryetari Xhemaili, duke shprehur besimin se qyteti gjithnjë e më shumë po shënon progres, falë angazhimit qytetar, institucioneve lokale dhe atyre të nivelit qëndror.
Në këtë akademi, për vlerat e ditës më të shënuar të qytetit, ditës historike, kanë folur edhe përfaqësues të shoqatave të dala nga lufta e UÇK-së, ndërsa akademia është shoqëruar edhe me pjesën artistike, me ç’rast është shquar prezentimi i korit të Shkollës së Mesme të Muzikës "Çesk Zadeja".
Po sot fotografi ferizajas Eqrem Ejupi, ka hapur një ekspozitë të fotografive artistike, ekspozitë tematike, nga shënimi i përvjetorit të parë të ditës së çlirimit të Ferizajt.
Dita e çlirimit të Ferizajt, 12 qershori, është shënuar të dielen me një varg manifestimesh.Qytetarë të shumët ferizajas por edhe drejtues të pushtetit lokal fillimisht marshuan rrugës kryesore të qytetit, për tu ndalur më pastaj tek varrezat e dëshmorëve të UÇK-së, për të ndëruar vepren e atyre që me sakrificen e tyre bënë që ne sot t’i gëzohemi kësaj dite.
