Kryetari i Ferizajt, Bajrush Xhemaili, nënkryetari Besim Zymberi si dhe drejtori i Drejtorisë Komunale të Planifikimit, Zhvillimit dhe Rindërtimit në Ferizaj, Ardian Ferizi, janë takuar me banorët e fshatrave, Greme, Gaçkë dhe Burrnik në Shkollën Fillore në Omuraj.
Me këtë rast numri një i komunës së Ferizajt, Bajrush Xhemaili, u ka sqaruar banorëve të këtyre fshatrave që të gjitha propozimet e dhëna nuk mund të realizohen, por sigurisht se ndonjëri prej tyre do të realizohet.”Për sivjet nuk mundemi me bë asnjë projekt më shumë, shpresojmë se do të përfundojnë këto të cilët janë në realizim e sipër, ndërkaq vitin tjetër do të shohim ato projekte të cilat janë më jetike për juve”, ka thënë Xhemaili. Ai u ka thënë banorëve të fshatit Greme se këtë vit nuk ka qenë e mundur që të realizohet projekti për asfaltimin e rrugës në lagjen e Spahiajve, për shkak se nuk ka pasur rishikim të buxhetit.
Nga ana tjetër banorët e fshatit megjithatë kanë qenë mirënjohës për të gjitha investimet që ka bërë Komuna e Ferizajt, në këto fshatra.
Idriz Halimi, qytetarë nga fshati Greme drejtuesve të qeverisë lokale i është drejtuar me kërkesën që të bëjë diçka konkrete që ky fshat të pajiset me rrjet të ujësjellësit për shkak se një gjë e tillë po u shkakton probleme të shumta. “Po them ky është një projekt që nuk mund të pritet , për shkak nuk kemi se ku të marrim ujë, duhet të dalim në qytet me ble ujë më shishe. As uji i puseve nuk pihet tek ne” ka thënë Halimi.
Ndërkaq , kryetari i Ferizajt, Bajrush Xhemaili, banorët e fshatit Greme u ka dhënë një sihariq se rrjeti i ujësjellësit shumë shpejt do të fillojë të realizohet në fshatin e tyre.”Ju nuk do të participoni asgjë. Ujë është tenderuar sivjet ka gjasa shumë të mëdha se sivjet do të fillojë të punohet , ndërkaq vitin tjetër i gjithë fshati do të jenë më ujë të pijshëm. Në këtë projekt do të na ndihmojë CDI-ja zvicerriane” është shprehur Xhemaili.
Afrim Matoshi, banorë i fshatit Greme, ka pasur tri propozime, prej tyre kanë qenë që të punohet dhe të rinovohet zyra e vendit në fshatin Gaçkë , për shkak të gjendjes së mjerueshëm në atë objekt, që të bëhet edhe fshati Greme me zyrë të vendit si dhe të bëhet edhe rregullimi i shtatores së dëshmorëve të UÇK-së , i cili është lënë pas dore me vite të tëra në fshatin Greme.
Ndërkaq , Megjide Mjaku, drejtoreshës së Shkollës Fillore “Jeta e Re” në fshatin Greme , ka kërkuar që në këtë shkollë të bëhet edhe në fushe sportive për nxënësit e shkollës, ndërsa ka shtuar se si zyre e vendit në fshatin Greme të jetë objekti i kooperativës në këtë fshat.
Në fund kryetari ka falënderuar të gjithë pjesëmarrësit të cilët kanë kontribuar me idetë e tyre , në mënyrë që projektbuxheti i vitit 2012 te jetë sa më i kompletuar.
Ndërsa sot nga kryetari Xhemaili me bashkëpunëtorë në orën 16:00 në objektin e shkollës fillore të Nerodimës do të takohet me banorët e fshatit: Jezerc, Nerodime e Poshtme, Nerodime e Epërme. Manastirc dhe Balaj, ndërkaq nga ora 18:00, në objektin e shkollës fillore të Slivovës do të takohet me banorët e fshatit: Dremjak, Lloshkobare, Slivovë dhe Koshare.
Banorët e fshatrave Greme, Gaçkë dhe Burrnik , kanë propozuar projekte të ndryshme për vitin 2012-2014
