U bë e ditur se mbi 400 mijë euro investime kanë qenë vetëm nga granti i përbashkët BE-MTI, ndërsa pjesa tjetër pothuajse e përafërt është mbuluar nga vetë bizneset.
Në aktin e inaugurimit të linjës së re prodhuese në fabrikën për prodhimin e mobileve “Sela Impex”, drejtues të kësaj fabrike, por edhe përfaqësues të BE-së, MTI-së dhe pushtetit të Ferizajt, kanë thënë se në fokus të investimeve do të jenë kompanitë e suksesshme që në planet e tyre investive prioritet e kanë rritjen e kapaciteteve prodhuese, kualitetin e prodhimit dhe gjenerimin e vendeve të reja të punës.
Bekim Musliu, pronar i firmës për prodhimin e mobilieve “Sela Impex”, ka thënë se ky grant i ka mundësuar që të instaloj komplet një linjë të re modern të prodhimit , e cila përveç që do të nxjerr produkte me kualitet, do të rris edhe numrin e vendeve të punës.
“Prodhimin e kam nisur para më shumë se dy dekadave, fillimisht si biznes familjar, të cilin gradualisht e kam zgjeruara dhe tash me këtë grant kamë përfituar një linjë të re prodhuese e cila ka ndikuar që të rris edhe numrin e të punësuarve, i cili tash ka shkuar në 60 të punësuar. Krahas kësaj, kjo makineri garanton edhe një kualitet të lartë me çka na bënë konkurrent edhe në tregun e rajonit dhe të Evropës”, ka thënë Musliu.
Në anën tjetër përfaqësuesi i BE-së për Kosovë, Christof Shtok, ka thënë se këto katër biznese janë përkrahur nga fondet e BE-MTI-së,ndërsa implementimin e ka bërë organizata IOM-i.
“Dy prej këtyre kompanive janë kompani të mesme , ndërsa dy të tjera janë kompani të vogla. Këto kompani janë të suksesshme ngase e kanë rritur kapacitetin e prodhimit, fuqinë punëtore dhe hapjen në tregun e brendshëm dhe të jashtëm .Janë të punësuar 30 persona nga investimet në këto projekte, mirëpo impakti do të jetë më i gjerë ngase përfitojnë edhe familjet e tyre, por edhe njerëz të tjerë që përfshihen në transport, shitje etj”, ka thënë Shtok, për të shtuar se së fundi BE-ja ka hapur ofertat edhe për investimet në degën e bujqësisë.
Për më tepër edhe zv/ministri i MTI_së, Avni Kastrati e ka vlerësuar këtë investim duke thënë se me këtë po mundësohet rritja dhe qëndrueshmëria e këtyre kompanive por edhe punësimi dhe mundësia për eksport.”Unë mendoj se është dikça si shumë e qëlluar,dhe ne, si Ministri duhet mi përkrah këto biznese në mënyrë që të kenë rezultate më të mira”, ka thënë Kastrati.
Investimet direkt kanë ndikim në ekonominë dhe në mirëqenien e qytetarëve të Ferizajt. Kryetari i Ferizajt, Muharrem Svarqa, duke folur për këto investime ka thënë se kjo do të thotë mjaftë për komunën e Ferizajt, si një lehtësim për bizneset në të cilat në vazhdimësi edhe komuna e ka kontributin e vet. Ai është treguar shumë mirënjohës dhe falënderues për përzgjedhjen e këtyre kompanive për përfitimin e granteve nga BE-ja, për të cilat ka thënë se do të ndikojnë edhe në zgjerimin e kapaciteteve, hapjen e linjave prodhuese dhe në të njëjtën kohë janë të lidhura me rritjen e numrit të punëtorëve, i cili sipas tij, përbën njërin nga problemet kryesore që ka Kosova.
“Komuna e Ferizajt ka nevojë për hapjen e vendeve të reja të punës dhe me politikat tona po nxisim një zhvillim ekonomik të qëndrueshëm në komunë. Është mirë që BE-ja ka qenë e vëmendshme që të investoj në ato veprimtari që kanë një traditë më të gjatë, që janë më rentabile dhe konkurruese në tregun e rajonit dhe më gjerë”, ka thënë Svarqa, për të shtuar se në këto rrethana Kosova duket si e getoizuar por që me marrëveshjen e MSA-së dhe liberalizimin e vizave do t’i hapin rrugë plasmanit të prodhimit në tregun Evropiana.
”Ne nuk do të kemi mundësi me prodhu aq sa janë nevojat e tregut evropian për këto produkte cilësore që po prodhohen në Ferizaj”, ka thënë Svarqa.
Ndryshe, përveç investimeve në linjat e kompanisë “Sela-Impex”, janë ndihmuar edhe fabrikat tjera, si ajo për prodhimin filtrave të automjeteve “Pure Power”në Babush, fabrika për prodhimin edhe shënimin e ambalazhit nga letra “Risi”në Bibaj dhe fabrika për prodhimin e rrjetës suvatuese “Avex” në Talinoc të Muhaxherëve.
Katër biznese prodhuese nga komuna e Ferizajt përfituese të granteve investive nga BE-ja dhe Ministria e Tregtisë dhe Industrisë (MTI), kanë prezantuar të mërkurën linjat prodhuese, me ç’rast është thënë se këto investime do të rrisin dukshëm kapacitetet prodhuese dhe numrin e fuqisë punëtore.
