Njësia për Zhvillim Ekonomik e Komunës së Ferizajt, ka kohë që është duke biseduar me përfaqësues të një kompanie gjermane, e cila firmë ekskluzivisht merret me përpunimin e drurit. Mustafë Grainca, drejtor i Drejtorisë për Ekonomi, Financa dhe Buxhet, ka thënë se kompanie gjermane ka shprehur interesimin që të bartë kapitalin e saj dhe përvojën në komunën tonë, për të shfrytëzuar resurset tona që kemi si potencial në lëmine e përpunimit të drurit. “Ne kemi mirëpritur këtë iniciativë dhe këtë kërkesë nga kompania gjermane dhe në mënyrë shumë serioze kemi shfaqur gatishmërinë tonë për të ndihmuar këtë kompani gjermane”, ka thënë Grainca, duke bërë të ditur se janë duke vazhduar me negociata dhe se shpreson se shume shpejt do të arrihet edhe deri tek një marrëveshje.
Grainca, ka thënë se janë të pritje që kompania gjermane të marrë certifikatën e biznesit e cila është në proces, e gjithashtu të marrë edhe pëlqimin nga Ministria e Ambientit. Pasi të kompletohen të gjitha këto, Komuna e Ferizajt është e gatshme, pasi që tanimë ka përcaktuar edhe ngastrën për ndërtim të kësaj fabrike e cila do të jetë në shfrytëzim. “Ngastra do të jetë në shfrytëzim, duke u bazuar në ligjin mbi zonat ekonomike. Ne e kemi edhe vendimin për krijim të zonave ekonomike, e në kuadër të këtyre zonave që ne kemi përcaktuar për zhvillim të bizneseve, inkurajim të bizneseve, dhënie në shfrytëzim të potencialeve zhvillimore investitorë të huaja dhe të brendshme, ne edhe kësaj kompanie do ja japim ngastrën në shfrytëzim”, ka thënë Grainca.
Duke besuar që do të kenë leverdi edhe si komunë Grainca, ka thënë se në kompaninë gjermane do të ketë edhe qytetarë të punësuar ashtu siç ka ofruar në planin e biznesit, por edhe ngritje ekonomike të komunës sonë. “Besojmë shumë se kjo do të ndodhë së shpejti dhe do të shohim frytet e këtij investimi të huaj”, ka thënë Grainca.
Fabrika për përpunimin e drurit e cila do të ndërtohen nga një firmë gjermane, sipas planit të biznesit pritet që të punësoj rreth 60 punëtorë, por me mundësi shtimi të të punësuarve. Ndërsa lokacioni për ndërtimin e saj, bëhet e ditur se do të jetë në fshatin Prelez i Muhaxherëve të Komunës së Ferizajt.
Pritet që së shpejti një kompani gjermane, në fshatin Prelez të Muhaxherëve të ndërtojë një fabrikë për përpunimin e drurit dhe kjo falë Njësisë për Zhvillim Ekonomik e cila është në bisedime me përfaqësues të kësaj kompanie.
