Po në këtë seancë Kuvendi vendosi që në afatin dy vjeçar të hartohen edhe tri plane të ngjashme për zonën e 3, 6 dhe 7 të qytetit, duke përfundua kështu planin e rregullimit urban. Sipas drejtoreshës së Drejtorisë së Pronës, Gjeodezisë dhe Kadastrit Qazime Vatës, ky plan është i një rëndësi shumë të madhe.”Është një zonë e cila e ka qenë mjaft e vështirë për të punuar për faktin se ka qenë një gjendje ekzistuese e ndërtuar dhe është një zonë me korridore shumë të ngushta të infrastrukturës rrugore, që në fakt kjo ka shkaktu telashe edhe për fazën e planifikimit, mirëpo konsiderojmë se është bërë një punë mjaft e mirë në këtë plan dhe janë zgjidh ato probleme nga aspekti urban. Tash presim që faza e implementim që patjetër që do të ketë vështersi në kuptim të afatit kohor dhe në kuptim të sigurimit të buxhetit për realizimin e këtij projekti nga aspekti i shpronësimeve”, ka thënë Vata, duke shtuar se dihet që komplet rregullimi i infrastrukturës, kërkon mjete buxhetore për të cilat Komuna duhet të përgatitet në faza të realizimit, sepse është e pamundur që e tëra të realizohet për një periudhë të shkurtër.”Ne tashmë i kemi thirr disa prioritete të cilat mendojmë që ti adresojmë në projektet e komunës me projekt buxhetin e vitit 2013, ndoshta do të ketë mundësi që edhe me rishikim diçka të bëjmë dhe të fillojmë të implementojmë të gjitha projektet të cilat do të jenë në harmoni, po ashtu edhe me zonën e parë që është e miratuar dhe me zonën e 8”, është shprehur drejtoresha Vata.
Është bërë e ditur se me miratimin e planit për zonën e 8 të qytetit do të përcaktohen të gjitha kushtet e ndërtimit.”Ajo çka është e rëndësishme nga ky plan është që do të thotë se përcakton të gjitha kushtet e ndërtimit, vijat e rregullimit, rregullimin e lokacioneve dhe është mjaft e rëndësishme që ky plan tash e tutje i kufizon zhvillimet e reja, do të thotë kontrollon për zhvillime të reja”, tha Vata.
Drejtoresha e Drejtorisë së Urbanizmit, Pronës dhe Kadastrit Qazime Vata, ka theksuar faktin se tashmë janë në proces të punëve të tjera që parashihen të bëhen në të mirë të qytetit të Ferizajt.
Në mbledhjen e fundit të Kuvendit të Komunës së Ferizajt është miratuar planin rregullues për zonën e 8 të qytetit, e cila përfshin hapësirën 253 hektarë sipërfaqe, që shtrihet ndërmjet rrugëve , "Vëllëzërit Gërvalla", "Rexhep Bislimi" dhe magjistralja për Prishtinë.
