Të gjithë qytetarët e rajonit të Ferizajt, që nga sot do të mund të marrin shërbime profesionale emergjente dhe me aparatura profesionale.
Hapja e qendrës emergjente e cila do të funksionojë në kuadër të QKMF-së, sipas zyrtarëve shëndetësor paraqet një hap shumë të rëndësishëm drejt plotësimit të nevojave në këtë fushatë.
Kryetari i komunës së Ferizajt, Muharrem Svarqa, investim i së cilës është qendra vlerësoi se ky institucion dhe stafi mjekësor gjithmonë do ta kenë mbështetjen e tij për faktin se këtu mbrohet dhe rikthehet jeta e njeriut.
“Hapja e kësaj qendre për shëndetësinë e Ferizajt, do të thotë shumë për shkak se po krijohen mundësi dhe hapësira të reja për qasjen e pacientëve dhe për mundësitë më të mira për trajtimin e tyre emergjent për shkak se këtu fillon celula e organizimit të shëndetësisë së Ferizajt, këtu në një mënyrë shpëtohet jeta, këtu janë të nevojshmet sekondat, këtu madje edhe shpesh here rikthehet jeta prandaj mendojë që këta njerëz që punojnë këtu janë heronj të shëndetësisë”, është shprehur kryetari Svarqa, duke theksuar se kjo qendër është me standarde evropiane.
Për të ndërtuar qendrën emergjente, Komuna e Ferizajt, ka investuar rreth 270 mijë euro, ndërsa për blerjen e aparaturave ka investuar rreth 100 mijë euro. U bë e ditur se shërbimet pritet të jenë të ndara në tri rrafshe, brenda qendrës, në terren me autoambulanca dhe shërbimet e kujdestarisë natën dhe gjatë pushimeve të cilat do të kryhen nga një staf profesional.
Në këtë përurim u tha se përpjekjet për plotësimin e nevojave të shëndetësisë do të vazhdojnë edhe më tutje në komunën e Ferizajt. U bë e ditur se së shpejti do të vihet gurthemeli për spitalin rajonal në hapësirat rreth parkut Liria.
Qeveria e Kosovës ka ndarë 200 mijë euro dhe 300 mijë komuna e Ferizajt, ndërkaq qeveria e Maltës ka premtuar se do të mbështes këtë projekt.
Këtë të martë në Ferizaj, është bërë përurimi I qendrës emergjente primare e cila do të funksionojë në kuadër të Qendrës Kryesore të Mjekësisë Familjare në Ferizaj.
