Edhe në Komunën e Ferizajt, tanimë ka përfunduar fushata e korrje-shirjeve e cila kishte filluar qysh me 9 korrik. Sipas zyrtarëve të Drejtorisë së Bujqësisë, kjo fushatë është kryer me mjaf sukses pasiqë edhe kushtet atmosferike ishin shumë të mira dhe për këtë arsye është arritur një rendiment edhe i lartë por edhe kualitativ.
Rendimenti i grurit për një hektarë, në Komunën e Ferizajt mesatarisht është sjellur nga 4300 deri 4500 kilogramë. “Në parcelat të cilat janë kultivuar më mirë dhe në të cilat nuk janë mbjellur monokulturë, e në të cilat edhe janë përdorur preparatet si herbicidi sekator, rendimenti aty është arritur edhe 7 mijë kilogram për një hektarë”, ka thënë Elfete Bislimi, zyrtare në Drejtorinë e Bujqësisë.
Mesatarja e grurit për një hektarë të korrur, sipas zyrtarëve, ndoshta do të ishte edhe më e madhe, por këtë mesatare e ulin disa sipërfaqe të cilat ishin të dëmtuara nga breshëri i cili goditi Komunën e Ferizajt rreth një muaj më parë. “Disa sipërfaqe të mbjellura me grurë, konkretisht në fshatrat e komunës sonë, të cilat u goditën nga breshëri u dëmtuan shumë dhe tani kemi këtë mesatare të rendimentit”, ka thënë Bislimi.
Po të krahasohen, rendimentet e grurit të marra këtë vit, me ato të vitit të kaluar të cilat për një hektarë ishin rreth 2800 kilogram, ky vit sipas Elfete Bislimi, zyrtare në Drejtorinë e Bujqësisë, dallon shumë, jo vetëm nga viti i kaluar por nga vitet e tjera paraprake. “Ky vit dallohet nga vitet e tjera shumë për nga rendimentet e larta të grurit. Këtë vit kushtet për grurë ishin shumë të përshtatshme, kishte reshje të mjaftueshme, por kishte edhe ditë me diell të mjaftueshme, ashtu siç kërkohet për kulturën e grurit”, ka thënë Bislimi.
Shumica e sipërfaqeve të mbjellura në Komunën e Ferizajt ishin të mbjellura me grurë, ku afro 4500 hektarë ishin të mbjellura me kulturën e grurit, por kishte sipërfaqe të mbjellura edhe me kulturën e thekrës, tërshërës dhe atë të elbit, ku shuma e përgjithëshme e sipërfaqes së mbjellur gjatë fushatës së korrje-shirjeve këtë vit ishte mbi 5 mij hektarë.
Këtë vit rendimente më të larta të grurit.
