Zllatari është shembulli sesi zonave të harruara për vite me radhë nga pushteti lokal, po i kthehen investimet duke i dhënë dimension të ri zhvillimit të fshatit dhe jetës së banorëve të kësaj ane të Ferizajt. Janë plot 18 rrugë të planifikuara të asfaltohen nga qeverisja Aliu për gjithë fshatin Zllatar, të cilat përfundimisht zgjidhin problemet me infrastrukturën rrugore, të munguar për dekada me radhë.
E pikërisht sot, u bë asfaltimi i njërës nga arteriet më të rëndësishme të këtij fshati në kuadër të projektit 220 mijë eurosh për finalizimin e infrastrukturës rrugore në këtë fshat. Për t’i përcjellë punimet, doli i pari i Ferizajt, Agim Aliu bashkë me drejtorin e Infrastrukturës, Arbër Bytyqi.
Ky i fundit tha se me këtë projekt, qeverisja lokale finalizon gjithë infrastrukturën rrugore në këtë fshat, duke ndikuar kështu edhe në cilësinë e jetës së banorëve.
“Jemi në fshatin Zllatar ku po bëjmë asfaltimin e rrugicave, projekt që e patëm filluar vitin e kaluar. Është një projekt, investim i Komunës së Ferizajt, i cili do të ndikoj direkt në përmirësimin e jetës të banorëve të fshatit Zllatar, pasiqë infrastruktura rrugore në këtë fshat nuk ka qenë në gjendje të mirë dhe ne në kuadër të këtij projekti të asfaltimit të rrugicave, do t’i asfaltojmë të gjitha rrugicat e fshatit Zllatar. Bëhet fjalë për një projekt prej 18 rrugicave me vlerë 220,000 euro. Pra me këtë projekt, ne po rregullojmë infrastrukturën rrugore të fshatit Zllatar dhe po ndikojmë në rritjen e cilësisë së jetës së banorëve” tha drejtori Bytyqi.
