Pas një debati në Kuvend kalon buxheti për vitin 2015
30/09/2014 00:00
Debati që u zhvillua me këtë rast nxori në dukje mospajtimet e opozitës nga radhët e PDK-së, të cilat nuk ndikuan që në fund edhe këta ta përkrahin këtë projektbuxhet. Fillimisht, kryetari i Ferizajt, Muharrem Svarqa, në cilësinë e propozuesit, theksoi se buxheti i vitit 2015 karakterizohet me ngritje të vlerës buxhetore për të tria grantet qeveritare, e poashtu sipas tij edhe ngritje të vlerës së planifikuar të të hyrave vetanake.
Duke iu referuar shifrave, Svarqa, ka vënë në dukje se vlera e buxhetit për vitin 2015 është 25 milion 659 mijë euro që krahasuar me buxhetin e këtij viti është më i rëndë për 2 milion e 400 mijë euro.
"Synim i qeverisë lokale është që në kuadër të strukturës buxhetore të shënojmë ngritje të vlerës së kategorisë së investimeve kapitale si dhe zvogëlimin e shpenzimeve të përfshira në kategorinë mallra dhe shërbime" ka thënë Svarqa.
Gjatë debatit që u zhvillua opozita ka adresuar një varg vërejtjesh, duke thënë duke thënë se kryetari Svarqa me këtë ndarje ka anashkaluar premtimet e tija të bëra në fushatë, për realizimin e investimeve madhore në Ferizaj, duke përmendur me këtë rast zhvillimin ekonomik, zbutjen e papunësisë, kafazin për hekurudhë, subvencionimin e bujqësisë dhe tjera.
Medain Hashani nga PDK-ja, ka thënë se kryetari ka lënë anash këto projekte të premtuara, të cilat konsiderohen të jenë të rëndësishme për qytetarin dhe interesat e tij jetike. Hashani ka zënë ngoje edhe projektin e spitalit, për të cilin nuk është ndarë asnjë cent, pastaj mosndarjen e fondeve për projektet e zhvillimit ekonomik, atyre të bujqësisë, nga të cilat varet gjenerimi i vendeve të punës. Me këto shuma të pakta, Hashani ka thënë se mund të punësohen një numër simbolik i të papunëve. Ai ka shfaqur edhe shqetësimin se 90 për qind e projekteve janë orinetuar në zona rurale, duke e nxjerr si konkulzion se qyteti është diskriminuar në këtë aspekt.
Edhe, Mustafë Grainca nga PDK-ja ka përmendur shumën e vogël të dedikuar për Drejtorinë e Zhvillimit Ekonomik, ndërsa ka tërhequr vërejtjen se nuk është realizuar faza e dytë e funksionalizimit të zonës ekonomike në Babush, më saktë studimi i fizibilitetit në këtë zonë. Edhe Bashkim Fazliu-Migjeni nga Nisma Qytetare për Ferizajn, përndryshe partner i koalicionit me LDK-në dhe AAK-në, ka shfaqur vërejtjet e tij për mungesë të investime në disa zona, për anashkalim të veteranëve të luftës dhe mungesën e projekteve të banimit për ta dhe tjera.
Qazim Rrahmani nga PDAK ka kërkuar më shumë projekte infrastrukturore të komunitetet pakicë, duke arsyetuar propozimin se nga viti 2012 nuk është investuar asgjë në vendbanimet e komuniteteve.
Mospajtime ka shprehur edhe Sylejman Zeka nga grupi i VV-së, duke thënë se buxheti nuk përmbush interesat e qytetarëve dhe se po vazhdon mentaliteti i nepotizmit, familjarizmit dhe klientelizmit gjatë përcaktimit të investimeve nëpër zona të ndryshme të Ferizajt, me ç’rast ka thënë se VV-ja do të jetë kundër miratimit të tij.
Pro buxhetit janë deklaruar këshilltarët nga radhët e pozitës. Muhamet Çerkini nga LDK-ja ka kërkuar qasjen e komunës gjatë hartimit të buxhetit nga niveli qendror, pasi Komuna e Ferizajt në vazhdimësi po diskriminohet, ndonëse është ndër kontribuesit më të mëdhenj në shkallë vendi.
Kreu komunal i Ferizajt ka shprehur mospajtimet e tij me shumicën prej këshilltarëve komunal. Svarqa ka folur për projektin e spitalit, për të cilin ka thënë se do të realizohet gjithsesi në të ardhmen, pasi është projekt që ka kaluar në nivelin qendror. Por, ka përkujtuar se në rast se nuk mbështetet nga niveli qendror, atëherë do të sigurojë një buxhet prej 2.5 milion euro, për ndërtimin e një spitali për nevojat e qytetit të Ferizajt, por jo edhe ta rajonit. Kafazi i hekurudhës, sipas tij, ngërthen një kosto të lartë dhe ky projekt mund të realizohet vetëm përmes partneritetit publiko-privat.
Numri një i Ferizajt ka dhënë shpjegime edhe për çështje tjera të ngrehura nga këshilltarët komunal, si për investime në qytet dhe fshatra, fillimin e zgjidhjes së problemit të banimit për kategoritë e dala nga lufta përmes ndarjes së banesave për ta, investimet me donatorë në projekte të zhvillimit ekonomik dhe tjera. Svarqa në fund e ka vlerësuar si demokratike qasjen e këshilltarëve për t’u marrë me buxhetin dhe fushat e investimeve.
Kuvendi komunal i Ferizajt, në një seancë të rregullt me shumicë votash i ka dhënë dritën jeshile buxhetit të komunës për vitin 2015, i cili krahasuar me buxhetin e këtij viti është më i lartë për afro 2.4 milion euro apo shprehur në përqindje për afro 10.33%.
Debati që u zhvillua me këtë rast nxori në dukje mospajtimet e opozitës nga radhët e PDK-së, të cilat nuk ndikuan që në fund edhe këta ta përkrahin këtë projektbuxhet. Fillimisht, kryetari i Ferizajt, Muharrem Svarqa, në cilësinë e propozuesit, theksoi se buxheti i vitit 2015 karakterizohet me ngritje të vlerës buxhetore për të tria grantet qeveritare, e poashtu sipas tij edhe ngritje të vlerës së planifikuar të të hyrave vetanake.