Nis zbatimi i projektit të vëzhgimit përmes kamerave të sigurisë
03/02/2016 00:00
Kryetari i Ferizajt, Muharrem Svarqa ka thënë me këtë rast se ky projekt e vë nën kontroll vëzhgimin e tërë qytetit të Ferizajt, një projekt që ka ardhur si rezultat i bashkëpunimit të komunës me Policinë e Kosovës. Ai ka shtuar se ky projekt ka gjetur përkrahjen institucionale dhe është ndoshta njëri ndër projektet më me rëndësi që po implementohet së fundi.
“Jam shumë i lumtur sepse tregon për një shkallë të lartë të sigurisë së qytetit dhe qytetarëve. Të dhënat të cilat kanë kaluar në vlerësim edhe në raportimet e PK_së dhe nga drejtori regjional dhe komandanti i policisë, në të cilat takime kanë qenë edhe anëtarë të qeverisë lokale të cilët kanë raportuar për të gjitha të dhënat që janë trajtuar, por të njëjtat kanë kaluar edhe në mbledhjet e Këshillit Komunal në Bashkësi. Këto të dhëna gjatë shqyrtimit na kanë bërë edhe neve që të ndjehemi mirë për shkak se gjatë vitit 2015 i tërë regjioni nuk ka pasur asnjë rast vrasje dhe ulje të shkallës së kriminalitetit që tregon një shkallë të lartë të sigurisë jo vetëm të ne por edhe më gjërë”, ka thënë Svarqa
Për më tepër Svarqa, ka shtuar se në këtë qendër që është pjesë e realizimit të këtij projekti përmes monitorëve që mbajnë në vëzhgim çdo lëvizje në hyrje dalje dhe tërë qytetin e Ferizajt tregon për një përmbushje të standardeve evropiane të cilat po synohet që të realizohen si pjesë e integrimeve për çka po punohet për çdo ditë.
“I përgëzoj të gjithë këta që punojnë këtu dhe stafin tim që është përkujdesur që në përpikëri të jetësohet ky projekt tepër i veçantë i cili për herë të parë po ndodh të ne dhe i përgëzoj dhe i mbështesë në realizimin edhe të pjesëve të tjera që duhet të bëhet në të ardhmen, sikurse janë vëzhgimi I stadiumeve të futbollit, çerdhes së re dhe parkut të lirisë”, ka thënë Svarqa.
Në anën tjetër Drejtori Rajonal I Policisë së Ferizajt, nënkolonel Gazmend Hoxha, ka vë në dukje se rëndësia e këtij projekti është e padiskutueshme dhe i cili do të ketë impakt në zbulimin e veprave të cilat ndodhin.
”Ne mendojmë se ky është njëri ndër projektet më të mëdha për operativen parandaluese dhe se vetëm instalimi i këtyre kamerave do të ketë efektin e vete në parandalimin e krimit. Të paktën mendojmë se 5-10 përqind i nivelit të krimeve do të bie në territorin e komunës së Ferizajt gjatë këtij viti si rezultat i këtij projekti”, ka shtuar Hoxha, teksa ka përmendur faktin se si parakusht për një policim modern duhet të ketë polic profesional, partneritet me qytetarët si dhe mundësitë për t’i ndjekur trendet e teknologjisë së fundit dhe përdorimin e saj në të mirë të qytetarit.
I pari i kësaj drejtorie nënkoloneli Gazmend Hoxha, duke u ndërlidhur me konfidecionalitetin e të dhënave ka thënë se vëzhgimi me kamera është bërë në pajtim me ligjin për mbrojtjen e të dhënave profesionale.
”Agjencioni e ka një veb faqe dhe ne nga kjo kemi marrë të gjitha autorizimet dhe detyrimet që dalin si polici dhe si komunë gjatë përpilimit të raportit dhe planit për implementim. Deri më tash jemi korrekt me ligjin. E drejta e privatësisë do të ruhet në mënyrë të skajshme dhe ne, përveç që kemi instaluar këtë sistem, kemi instaluar edhe një sistem për qasjen e personave në këto filmime dhe këto në mënyrë automatike ruhen dhe po ashtu në mënyrë automatike shkatërrohen. Sistemi i marrjes apo i shikimit është rregulluar,brenda policisë deri më tani nuk ka qasje askush përveç policisë , kështu do të jetë edhe në të ardhmen”, ka thënë Hoxha, i cili zgjerimin e këtij projekti e sheh me tone pozitive edhe në vëzhgimin nga jashtë të objekteve shkollore dhe lokaleve për rreth tyre.
Policia e Ferizajt që nga sot ka nisur së zbatuari projektin e vëzhgimit të qytetit përmes kamerave të sigurisë, projekt ky që komunës së Ferizajt i ka kushtuar 100 mijë euro. Me këtë rast është thënë se ky projekt do të kontribuoj në rritjen e nivelit të sigurisë, ndërsa autoritetet kanë paralajmëruar edhe mundësinë e zgjerimit të këtij rrjeti edhe në objektet tjera ku ka një frekuentim më të madh të qytetarëve si në terrenet sportive, parkun e lirisë dhe objektet shkollore.
Kryetari i Ferizajt, Muharrem Svarqa ka thënë me këtë rast se ky projekt e vë nën kontroll vëzhgimin e tërë qytetit të Ferizajt, një projekt që ka ardhur si rezultat i bashkëpunimit të komunës me Policinë e Kosovës. Ai ka shtuar se ky projekt ka gjetur përkrahjen institucionale dhe është ndoshta njëri ndër projektet më me rëndësi që po implementohet së fundi.