Kryetari i Ferizajt, Bajrush Xhemaili i ka njoftuar qytetarët se buxheti i viti 2010 para rishikimit të tij kishte një vlerë prej mbi 15 milion euro, ndërsa me rastin e rishikimit është rritur për 400 mijë euro. Deri me tani këto mjete, sipas Xhemailit janë shpenzuar në masën prej 34 për qind, në të gjitha kategoritë buxhetore. "Gjatë kësaj periudhe në fushën e investimeve kapitale janë finalizuar 8 projekte, në fazën e realizimit janë 19 projekte kapitale, në fazën e prokurimit deri në mbyllje të kësaj periudhe janë 43 projekte kapitale dhe në fazën e projektimit edhe 17 projekte. Duhet theksuar se gjatë këtij viti fiskal janë planifikuar dhe miratuar 85 projekte kapitale, prej tyre 51 projekte të infrastrukturës rrugore përfshirë kanalizime, ujësjellës, trotuare, 24 projekte në fushën e arsimit, 2 projekte në fushën e urbanizmit si dhe 8 projekte në fushën e shëndetësië" ka thënë Xhemaili.
Z. Xhemaili është ndalur edhe te funksionimi i Njësisë për Zhvillim Ekonomik, e cila vepron në kuadër të zyrës së kryetarit, duke vënë në dukje takimet që ka zhvilluar me përfaqësues të bizneseve të huaja për mundësinë e bartjes së kapitalit të tyre, për të investuar në Ferizaj.
"Nga këto takime së shpejti do të kemi edhe rezultatet e para. Priten rezultate konkrete me konzorciumin zviceran rreth projektit të riciklimit të mbeturinave" ka potencuar Xhemaili. Rreth të hyrave, kryetari i Ferizajt ka thënë se gjatë kësaj periudhe janë inkasuar në përgjithësi 1.3 milion euro, ndërsa vetëm nga tatimi në pronë si të hyra primare janë inkasuar mbi 500 mijë euro, apo 4.97 për qind më shumë se në periudhën e njëjtë të vitit të kaluar.
Qytetarët e Ferizajt u përqendruan në shumë aspekte që kanë të bëjnë me zhvillimin e komunës dhe investimet që duhet bërë.
Shaban Bajrami, shtroi çështjen e ndërtimit sipas kritereve të gungave nëpër rrugë, ndërsa Besim Shabani kërkoi nga kryetari që në vitin 2011 të hyjë si prioritet asfaltimi i rrugës Koshare-Lagjja e Lubocëve, një vendbanim që prej shumë vitesh është lënë pasdore. Pati kërkesa edhe për instalimin e ndriçimit publik nëpër shumë rrugë të qytetit, sikur në rrugën "Kadri Zeka" por nuk munguan as kërkesat për ri-instalim të rrjetit të kanalizimit fekal si dhe sistemit të ujësjellësit.
Kryetari Xhemaili u ka thënë qytetarëve se komuna do të bëjë shumëçka për zgjidhjen e problemeve të tyre, në ato raste kur zgjidhja duhet bërë nga komuna, duke u dhënë premtime qytetarëve se kërkesat e tyre një për një do t’i analizojë.
Për gungat në rrugë, apo siç njihet tradicionalisht si "polici i shtrirë" tha se do të hiqen gjitha ato gunga që janë shndërruar në pengesë, ndërsa për asfaltimin e rrugës së Lubocëve tha se kjo rrugë dhe rruga për Burrnik, janë rrugë të pakëta që kanë mbetur pas asfalt dhe viteve tjera pritet që të ketë investime.
Lidhur me kornizën afatmesme buxhetore 2011-13, kryetari Xhemaili nënvizoi se listat me projekte që kanë qytetarët para vetes, do të pësojë ndryshime, për shkak se mundësitë buxhetore janë të kufizuara, ndaj qytetarët duhet të përcaktojnë prioritetet.
"Të gjitha projektet e propozuara nuk do të mund të realizohen. Për vitin 2011 janë vetëm 6.3 milion euro në dispozicion, ndaj duhet bërë reduktime të kësaj liste" ka theksuar Xhemaili. Edhe për këtë aspekt qytetarët shtruan një varg kërkesash, kryesisht për investime në infrastrukturë.
Komuna e Ferizajt ka organizuar debatin e parë publik me qytetarë, me qëllim të njohjes së tyre me investimet që janë duke u bërë këtë vit, me rrjedhën e të hyrave vetjake si dhe plotësimin e kornizës afatmesme buxhetore për vitin 2011-13.
