Ministri i Mjedisit dhe Planifikimit Hapësinor (MMPH) Dardan Gashi ka ardhur të premten në Ferizaj, për ta firmos bashkë me kryetarin e Ferizajt, Agim Aliu, projektin për rregullimin e shtratit të lumit Neredime. Për këtë projekt ministria ka ndarë një fond prej 500 mijë euro, ndërsa projekti do të jetë 2-vjeçar dhe një fazë e tij do të realizohet këtë vit, ndërsa i tëri do të finalizohet vitin e ardhshëm.
Ministri Gashi ka thënë se Ferizaj viteve të fundit ka investuar mjaft në mjedis, duke realizuar një sërë projektesh ambientaliste, ndër të cilat meritojnë të veçohen 50 hektarë gjelbërim që janë bërë, ndërsa projektin e shtratit të lumit Neredime në fjalë e ka parë si vazhdimësi e investimeve që po bëhen në këtë lëmi me interes.
"Ky projekt hyn në vazhdën e punëve që po ministria për riparimin e shtretërve të lumenjve nëpër komuna të Kosovës. Unë përgëzoj deputetët e Kuvendit të Kosovës që vijnë nga Ferizaj për kërkesat që kanë bërë në ministri për këto projekte, po kështu edhe kryetarin dhe ish-kryetarin e Ferizajt. Ministria do të vazhdojë edhe më tej të mbështes Komunën e Ferizajt edhe me projekte tjera" ka thënë ministri Gashi.
Nga ana tjetër, kryetari i Ferizajt, Agim Aliu ka thënë se Komuna e Ferizajt dhe Ministria e Mjedisit janë në një linjë sa u përket investimeve kapitale, nga shkaku se komuna plot katër vjet ka shprehur përkushtimin dhe interesimin e saj për të ndryshuar shumëçka në mjedisin jetësor në të mirë të qytetarëve. Duke folur për projektin e shtratit të lumit Neredime, kryetari Aliu ka nënvizuar se krahas rregullimit të shtrati të lumit Neredime, do të zgjidhet edhe çështja e vërshimeve, ndërsa do të ngrehet edhe një shetitore, do të rregullohet edhe ndriçimi publik, duke e shndërruar këtë zonë në një vend atraktiv dhe joshës për qytetarët.
Kryetari Aliu ka thënë se ministrin Gashi në takimin që ka zhvilluar me të ka diskutuar edhe për probleme tjera që lidhen me ambientin jetësor, duke kërkuar për disa syresh edhe zgjidhjen e tyre.
"Ministri do të mbështes edhe projektin kapital në Ferizaj, vazhdimin e projektit Ibër-Lepenc në këtë pjesë, ndërtimin e një ujëmbledhësi, të cilin ne e kemi theksuar vazhdimisht. Ministri ka thënë se është në kontakt me Bankën Botërore dhe asociacionet tjera ndërkombëtare dhe këto po i japin mbështetje këtij projekti" ka thënë kryetari Aliu.
Investohet në rregullimin e shtratit të lumit Neredime
