Në motivacionin e lexuar me këtë rast është thënë se Nuhiu, studimet në Fakultetin Ekonomik, i ka kryer me notën mesatare 10, sukses ky i arritur falë punës dhe përkushtimit të treguar gjatë studimeve. Me këtë rast kryetari i Ferizajt, Muharrem Svarqa, ka thënë se vetë fakti se Nuhiu e ka përfunduar fakultetin me këtë notë mesatare e ka shtyrë atë dhe kabinetin e tij që ta ndajë këtë mirënjohje për rezultatet në fushën e arsimit.
"Meqë jem në fillim të vitit të ri akademik, ne kemi dashur ta nxjerrim një nga studentet i cili ka përfunduar me notë maksimale studimet si dhe punimin e diplomës me 10.00, që është një ndër rastet e rralla edhe në kuadër të këtij fakulteti që nga themelimi i tij. Në bazë të njohurive të mia nuk di që në komunën e Ferizajt ka pasur ndonjë që në këtë fakultet të diplomoj dikush me ketë not mesatare", ka thënë Svarqa.
Për më tepër u bë e ditur se ky i ri ferizajas ka diplomuar në drejtimin e kontabilitetit, ndërsa është thënë se komuna është e interesuar që t’i hulumtoj këto raste me këto rezultate.
"Unë dëshiroj që të gjithë atyre që kanë filluar studimet në këtë vit që t’ju prezantoj këtë model dhe që të gjithë ta marrin si model të një studenti të shkëlqyeshëm , të dalluar dhe që natyrisht përmes tij të punojmë në kultivimin e vlerave të dijës meqë edhe qyteti i Ferizajt është shndërruar në një qytet të dijes përmes Universitetit Publik të Shkencave Aplikative, i cili këtë vit ka filluar për herë të parë vitin akademik në këtë cilësi", ka nënvizuar kryetari Muharrem Svarqa.
Në anën tjetër i sapo diplomuari, Nuhi Çerkini, e ka falënderuar kryetarin për këtë mirënjohje duke thënë se këtë e ka arritur falë punës së tij, ndihmesës së familjes dhe shokëve.
" I falënderoi të gjithë ata që më kanë ndihmuar gjatë ecjes sime, kjo mirënjohje është një pasqyrim për të gjithë studentet e Ferizajt për punën e tyre të palodhshme", ka thënë Çerkini, i cili ka adresuar edhe një porosi për prindërit që sa më shumë t’i mbështesin fëmijët e tyre drejtë sukseseve që janë të arritshme. Ky i ri nuk e ka fshehur faktin se gjatë studimeve ka pasur edhe sfida, të cilat sipas tij janë përballuar falë punës që ka bërë dhe përkrahjes që ka pasur nga familja dhe shokët. I pyetur për planet e tija, Nuhiu, ka thënë se do t’i përkushtohet me tërë qenien e tij lëmit të auditimit, ndërsa nuk e ka përjashtuar edhe politikën si opcion.
Studenti ferizajas i shkencave ekonomike, Nuhi Çerkini, është nderuar me mirënjohje të premten nga kryetari i Ferizajt, Muharrem Svarqa, në shenjë respekti për punën e tij të suksesshme gjatë studimeve në Universitetin e Prishtinës.
