Ministri i Infrastrukturës, Lutfi Zharku ka premtuar se këtë vit dhe në periudhën e ardhshme do të realizohen një varg projektesh infrastrukturore, me të cilat do të zgjidhen problemet e kahmotshme të banorëve të kësaj zone.
"Unë jam këtu për të shprehur gatishmërinë time dhe të kryeministrit Mustafa e Qeverisë së Kosovës për një përkrahje më të madhe për projektet infrastrukturore të Ferizajt", ka thënë ministri Zharku.
Ndërsa kreu komunal i Ferizajt, Muharrem Svarqa ka thënë se me ministrin Zharku ka biseduar për projektet që janë në realizim e sipër dhe ato që do të realizohen në të ardhmen.
"Në bisedat që patëm me ministrin e Infrastrukturës, arritëm pajtueshmëri të plotë që të përfundojmë projektet, të cilat janë në realizim e sipër dhe të merremi me hartimin e projekteve të reja që do të jenë projekte potenciale me rishikim të buxhetit dhe për ato me të cilat do të konkurrojmë në vitin 2016, pa i specifikuar se cilat do të kenë përparësinë e vet, sepse të gjitha do të kenë rolin e vet për Komunën e Ferizajt", ka thënë Svarqa.
Ndër projektet imediate, numri një i Ferizajt ka përmendur rrugën "Driton Islami", e cila do të fillojë se realizuari, pasi ka qenë e tenderuar, por për mungesë të infrastrukturës nëntokësore nuk ka arritur të realizohet, vazhdimin e punimeve në rrugën "Brahim Ademi" deri tek Parku i Lirisë me katër korsi, e cila do të ketë një lidhje përreth kazermës me rrugën për Jezerc e Neredime, projektin e rrugës nga Kosharja tek Lubocët e Babush që do të lidhë rrugët magjistrale dhe do të shkurtojë mënyrën e qarkullimin rrugor, projektin e rrugës nga Prelezi deri në Fshatin e Vjetër, ndërtimin e një rreth-rrotullimi në vendin ku tash gjendet Ura e Madhe, e cila do të heqet dhe projekte tjera, si nënkalimi në Sojevë, nënkalimi në rrugën ‘Brahim Ademi’ që s’ka qenë i paraparë në projekt, nënkalimi i hekurudhës në fshatin Nikadin, projektet e rrugëve alternative që do të realizohen gjatë vitit 2016 me rishikim, rruga nga Pleshina në Kashtanjevë, rruga Greme-Burrnik e Gaçkë-Burrnik dhe rruga e Rahovicës që do të lidhet me rrugën e Gadimes që shpie për në Gjilan.
Nga ana tjetër, në këtë takim, ministri Zharku ka thënë se me kryetarin ka biseduar për projektin e autostradës, tenderët e shpallur për rehabilitimin e rrugëve aktuale nga QMI-së deri në Han të Elezit, rrugën Ferizaj-Gjilan, Gurëz-Viti, rrugë që siç tha, që janë degraduar tej mase dhe lypset bërë investime të domosdoshme.
Ndër temat e trajtuar mes Zharkut dhe Svarqës u tha të ketë qenë edhe cilësia e punimeve. Ky i fundit ka thënë se kupton shqetësimet e qytetarëve për rrugën Ferizaj-Shtime që është dëmtuar, por ka përkujtuar se do të ketë edhe një fazë të asfaltimit të saj, sikurse edhe disa rrugëve lokale. Në këtë takim është thënë se viteve të fundit, në Ferizaj është investuar pak në infrastrukturë, më pak se në komunat tjera.
"Gjatë takimit konstatuam se Ferizaj, sipas statistikave që kemi, ka përfituar në projekte infrastrukturore 12 milionë euro, shumë që është shumë e paktë në krahasim me komunat tjera të Kosovës dhe ka një anashkalim të pavëmendshëm të qytetit të Ferizajt në përfshirjen e objekteve të rëndësishme infrastrukturore, ndërsa ne dakorduam që ta ndryshojmë në në të mirë të të gjithë qytetarëve", ka thënë Svarqa.
Ministri Zharku ka thënë se ekziston vullneti i tij dhe i kryetarit Svarqa, por që kjo varet nga ndarja e buxhetit dhe Parlamenti i Kosovës që miraton përfundimisht buxhetin.
"Do të bëjmë përpjekje maksimale që projektet bazë për t’i realizuar. Do të ketë një tejkalim të shumës që është investuar deri më tani në Ferizaj", ka thënë Zharku.
Ndërsa Svarqa nuk e ka përjashtuar mundësinë e zhvillimit të një takimi me deputetët e Kuvendit të Kosovës nga Ferizaj, për të kërkuar edhe nga ta që të mbështesin projektet e idejuara infrastrukturore për rajonin e Ferizajt.
Kryetari i Ferizajt, Muharrem Svarqa, këtë të mërkurë ka pritur në një takim ministrin e Infrastrukturës Lutfi Zharkun me bashkëpunëtorët e tij.
