Në kuadër të fushatës së rekrutimit për përbërjen rezervë të FSK-së, ministri i FSK-së, Fehmi Mujota, të hënën vizitoi Ferizajn, ai i me këtë rast përgëzoi kryetarin Xhemaili për përkrahjen e të gjitha proceseve të deritashme për zhvillimin e FSK-së, e sidomos për qendrën stërvitore të FSK-së, në Ferizaj. "Ne marrim çdo herë raporte dhe deklarime, të cilat janë reale, se FSK-sa, këtu në Ferizaj, ka një përkrahje të gjerë, jo vetëm nga institucionet komunale por edhe nga të gjithë qytetarët e kësaj komune dhe ky është një lajm i mirë për të gjithë ne", ka thënë Mujota.
Mujota, gjatë kësaj vizite, ka informuar kryetarin Xhemaili për aspektin e kësaj fushate të rekrutimit. Ai ka thënë se mirëpresin çdo të rinjë dhe çdo profesionist i cili plotëson kushtet për të qenë pjesë e përbërjes rezervë të FSK-së, në këtë fazë. "Po punojmë ngushtë që të arrijmë kapacitetet e plota operacionale deri në vitin 2012, për të hapur më pas rrugën për vendime të rëndësishme politiko ushtarake për të mirën e vendit dhe për ngritjen e kapaciteteve tona të sigurisë", ka thënë Mujota, duke shprehur gatishmërinë, që në çdo projekt i cili ka të bëjë me kapacitetet që kanë në FSK, t’a përkrahin Komunën e Ferizajt por edhe komunat tjera.
Një ndër përkushtimet që përmendi ministri Mujota, i cili sipas tij është një standard i pranuar në Bruksel për të pasur deklarime të duhura për kapacitetet e FSK-së, është edhe prania e të gjitha komuniteteve në FSK. "Deri më tani jemi të kënaqur që kemi të gjitha diverzitetet kulturore dhe religjioze në FSK", ka thënë Mujota. Aktualisht në FSK, janë 8.3 përqind nga komunitetet pakicë, në numrin e rreth 2 mijë pjesëtarëve sa ka tani FSK-ja, ndërsa synohet që kjo përqindje të ruhet deri në arritjen e kapaciteteve të plota.
Këtë vit pranohet 400 pjesëtarë rezervë
Ndërsa kryetari i Komunës së Ferizajt, Bajrush Xhemaili, duke falënderuar ministrin Mujota për vizitë, ka thënë se tema e bisedës së tyre ishte edhe bashkëpunimi sa më i ngushtë në kuadër të rekrutimin e pjesës rezerve të FSK-së. Xhemaili, ka thënë se, ka siguruar ministrin Mujota për një angazhim të fuqishëm, në mënyrë që në këtë fushatë të përzgjidhen ata që janë më të mirë dhe më të aftë, në kuadër të gjitha nacionaliteteve. "Do t’a kemi një bashkëpunim shumë të ngushtë në këtë fushatë. Biseduam edhe për çështje tjera të cilat ndërlidhen me komunë dhe ne si komunë do t’a mbështesim në atë së çka ka nevojë FSK-ja", ka thënë Xhemaili.
Këtë vit, synohet që FSK-ja, të pranon deri në 400 pjesëtarë rezervë, konkurrenca deri në këtë fazë u bë e ditur se është mjaft e lartë, por deri në mbyllje të konkursit i cili do të jetë i hapur deri më 22 tetor të jetë edhe më e madhe. Ndërsa, në vitin tjetër, pritet të jetë edhe një gjeneratë tjetër e pjesëtarëve rezervë po ashtu prej 400 pjesëtarëve tjerë rezervë. Ndërsa, si synim i FSK-së, është që të përmbushin obligimet kushtetuese, që deri në fund të vitit 2011 të ketë 2 mijë e 500 pjesëtarë aktiv me detyrë në FSK dhe 800 pjesëtarë rezervë.
Ne marrim çdo herë raporte dhe deklarime, të cilat janë reale, se FSK-sa, këtu në Ferizaj, ka një përkrahje të gjerë, jo vetëm nga institucionet komunale por edhe nga të gjithë qytetarët e kësaj komune dhe ky është një lajm i mirë për të gjithë ne", ka thënë ministri Mujota.
