Sipas drejtorit të Drejtorisë Komunale të Administratës dhe Personelit Vesel Zhinipotokut punimet në meremetimin e ndërtesës së komunës jaë filluar që nga instalimi i plotë i rrjetit elektrik, rrjet ky i cili vazhdimisht ka paraqitur probleme.“Rrjeti elektrik i tanishëm daton qysh nga koha kur edhe është ndërtuar objekti i administratës komunale, ndërsa dihet se nevojat për konsum të energjisë tani janë shtuar shumë”, ka thënë Zhinipotoku.
Për shkak të hapësirave të ngushta, duke pasur parasysh edhe decentralizimin e shërbimeve nga niveli qendror në atë lokal, gjithashtu është duke u bërë edhe ndërtimi i një aneksi i cili është duke u bërë mbi pjesën ku gjendet drejtoria e arsimit. “Aty është duke u bërë edhe ndërtimi i një kati, i cili do të na krijojë hapësira të mjaftueshme, që në këtë mënyrë shërbimet tona të ofrohen në një hapësirë shumë më komode, ngase dihet se shërbimet çdo herë po vijnë duke u shtuar, ndërsa hapësira e objektit është ajo e cila ka qenë edhe më parë”, ka thënë Zhinipotoku.
Në kuadër të këtij projekti, gjithashtu është duke u bërë edhe ngjyrosja dhe fasadimi i hapësirave të brendshme të objektit të komunës, renovimi i kabinetit të kryetari të Komunës së Ferizajt ku aty është krijuar një hapësirë e re dhe një zyre e takimeve e cila sipas drejtorit Zhinipotokut i ka munguar kabinetit të kryetarit të komunës. Po ashtu me anë të këtij projekti do të bëhet edhe rregullimi i hapësirave të sektorit të gjendjes civile. “Ne kemi hulumtuar dhe kemi vërejtur se nëpër disa komuna kjo hapësirë është shumë më e përshtatshme dhe më funksionale për qytetarë dhe në kuadër të këtij projekti edhe ne do t’a bëjmë një risistemim të atij sektori”, ka thënë Zhinipotoku, duke bërë të ditur se në bazë të një udhëzimi administrativ janë të obliguar që në katin përdhese të objektit të komunës të bëjnë edhe një organizim të ri të ashtuquajturës zyrës pritëse që ishte më parë, tani në qendër për shërbime ndaj qytetarëve. “Aty do të krijohen hapësira të reja. Një organizim plotësisht i ri i atyre hapësirave, ku parashtruesit e kërkesave do t’a kenë vendin e veçantë, ndërsa shqyrtuesit do të marrin obligime të reja. Në këtë mënyre do të kemi edhe një efikasitet shumë më të madh gjithmonë në shërbim të qytetarëve”, ka thënë Zhinipotoku.
Ndërsa, në hapësirat e bodrumit të objektit të komunës sipas Zhinipotokut, do të bëjnë krijimin e hapësirave të favorshme për arkivin e administratës komunale. “Ne i kemi përgatitur planet se si do të bëhet kjo dhe besojmë që aty do të krijohet një hapësirë shumë e mirë, në mënyrë që lëndët të ruhen ashtu siç e kërkon edhe ligji mbi arkivat”, ka thënë Zhinipotoku, duke bërë të ditur se deri më tani arkivimi është bërë nëpër drejtori dhe sektorë të ndryshëm.
U bë e ditur se në përgjithësi vlera e projektit për meremetimin e ndërtesës së Administratës Komunale të Ferizajt do të jetë mbi 90 mijë euro.
Ashtu siç ishte paraparë edhe nga buxheti i vitit të kaluar, tanimë kanë filluar punimet për projektin e meremetimit në ndërtesën e Administratës Komunale të Ferizajt.
