Në kuadër të përpjekjeve për rritjen e vetdijsimit dhe qasjen e banorëve në vendimmarrje, rrejti i ojq-ve Avonet ka nënshkruar sot një marrëveshje bashkëpunimi mes kryetarit të Komunës së Ferizajt, Bajrush Xhemailit dhe përfaqësuesve të fshatrave Rakaj, Slivovë, Softaj dhe Papaz.
Iniciativa e formimit të këshillave nëpër fshatra është mirëpritur edhe nga kreu komunal Bajrush Xhemaili, i cili ka vlerësuar se kjo mënyrë do të jetë më e lehtë për të komunikuar me qytetarët. Ai ka shtuar se edhe participimi i banorëve për projektet e ndryshme do të jetë më i theksuar kur ka organizim në mesin e tyre.
“Është krijuar një mundësi e mirë që të komunikojmë me më shumë përgjegjësi sepse me nënshkrimin e kësaj marrëveshje obligohemi edhe ne edhe fshatrat”, ka thënë Xhemaili, duke shtuar se tani kanë një adresë më shumë nëpër fshatra, që janë formuar këta këshilla dhe është zgjedhur kryeplaku që të komunikojmë më mirë për përgjegjsitë tona po edhe banorët e fshatrave që kanë hallet e tyre
Ndërsa aktivistët e rrjetit të ojq-ve Avonet thonë se përmes projektit të krijimit të këshillave nëpër fshatra synojnë, krijimin e një kulture që problemet të adresohen aty ku mund të zgjidhen dhe banorët të jenë njoftuar me të drejtat e tyre.
Jeton Berisha, aktivist rrjetit të ojq-ve AVONET, ka thënë se roli i tyre në këtë projekt ka qenë që të ndërmjetësojë në mes banorëve dhe komunës. “Këshillat e fshatrave do ta kenë rastin të ndjekin trajnime dhe ligjërata për ta hartuar një plan strategjik i cili del në debat dhe pastaj prezantohet edhe në kuvend. Pra ky është pretendimi ynë dhe besojmë që do ta arrijmë një mënyrë të re të komunikimit”, ka thënë Berisha.
Këshilla e këtyre fshatrave janë formuar në pajtueshmëri me të gjithë banorët, dhe për herë të parë udhëhiqen nga njerëz apartiak, si të tillë ata kanë për obligim të përcaktojnë prioritetet për investime dhe më tutje t’i procedojnë ato në komunën e Ferizajt.
Aktivistë të këtyre këshillave premtojnë angazhim të duhur krahas nevojave të lokaliteteve të tyre.
“Roli ynë do të jetë që të jemi sa më aktiv që prioritetet tona të realizohen sa më parë. Aktualisht problem e kemi mungesën e ujësjellësit projekt ky që na është premtuar edhe gjatë fushatës zgjedhore por deri më tani nuk ka lëvizura asgjë. Shpresojmë të bëhet diçka vitin ardhshëm”, ka thënë Nazmi Tifeku, përfaqësues i fshatit Rakaj.
Ndërsa Ilaz Ramadani, përfaqësues i fshatit Slivovë ka thënë se ky këshill do të punojë për interesat e fshatit. “ Është me rëndësi që ne punojmë të pa ndikuar nga partia. Prioritet e kemi asfaltimin e rrugëve në fshat dhe për këtë do të angazhohemi me komunën së bashku që të mund të përfitojnë banorët nga ky projekt”, ka thënë Ramadani.
Aktivistët e rrjetit AVONET , kanë thënë se për fillim i kanë përzgjedhur fshatrat që janë të papërfaqësuara në Kuvend dhe nuk kanë qenë përfituese të shumë projketeve.
“Është krijuar një mundësi e mirë që të komunikojmë me më shumë përgjegjësi sepse me nënshkrimin e kësaj marrëveshje obligohemi edhe ne edhe fshatrat”, ka thënë Bajrush Xhemaili, kryetar i Komunës së Ferizajt
