USAID-i amerikan ka shënuar 15 vjetorin e veprimtarisë në Kosovë me disa aktivitete mbresëlënëse në Ferizaj. Në sheshin e qytetit, disa stenda përplot me materiale të ndryshme informative e fletëpalosje të shumta ishin vendosur në to dhe të njëjtat pasqyronin edhe punën e bërë për këto vite ashtu edhe programet e kësaj organizate që u ofroheshim qytetarëve.
Zëvendësdrejtori i misionit të USAID-it në Kosovë, Chris Edwards ka theksuar se 15 vjetori i partneritetit për ndryshime në Kosovë, ka sjellur rezultate inkurajuese në shumë fusha, pasi USAD-i ka qenë ndër donatorët e parë në Kosovë dhe vazhdon aktualisht të mbetet njëri prej donatorëve më me rëndësi.
Duke përshkruar punën e bërë nëpër vite Edwards ka theksuar se në Kosovë janë investuar 800 milionë dollarë në projekte të ndryshme punësimi dhe infrastrukture, të cilat kanë pasur ndikimet e tyre pozitive për popullatën vendëse, ndërsa ka folur edhe për projektet që janë realizuar në Ferizaj.
"Është bërë shumë punë nga viti 1999. Në Ferizaj janë shpenzuar 2.3 milionë dollarë për investime në shumë aspekte, në rrugë, rrjetin e energjisë elektrike, shëndetësi dhe tjera" , ka theksuar Edwards, për të vënë theksin edhe në projekte tjera që ka realizuar agjencioni në shumë vendbanime të Kosovës, veçmas në fushën e ndërmarrësisë. Sipas tij, nga këto janë krijuar 20 mijë vende pune përmes qasjes në kredi, prej mbi 80 milionë dollarësh, pa harruar të përmend edhe projektet në fushën e edukimit.
"USAID-i ka bërë investime madhore, duke formuar qendra për zhvillimin profesional dhe qendrat për vlerësim", ka thënë Edwards.
Numri dy i kësaj agjencie ka vënë në dukje edhe mbështetjen për gjyqësorin në shumë rrafshe, për të përmendur më këtë rast krijimin para një muaji programin për të drejtat pronësore me qëllim të edukimit me këtë problematikë mjaft me interes.
Edhe kryetari i Ferizajt, Muharem Svarqa ka vënë në dukje se mbështetja e USAID-it për këto vite ka qenë shumë domethënëse për komunitetin dhe institucionet dhe kjo është arritur falë partneritetit të ndërsjellë dhe komunikimit shumë të afërt.
"Po shënojmë sot 15 vjetorin e funksionimit të kësaj agjencie, nga e cila kemi përfituar shumë, duke u treguar partnerë të rëndësishëm në sendërtimin e programeve zhvillimore me interes", ka theksuar Svarqa, duke numëruar më pas projekte të ndryshme mbështetëse që janë realizuar në shumë fusha me interes për institucionet dhe qytetarët e Ferizajt. Numri një i Ferizajt ka falënderuar udhëheqësit e kësaj organizate ndërsa është zotuar se ky partneritet do të vazhdojë edhe në të ardhmen.
“Projekti i iniciuar sivjet ka të bëjë me mbështetjen e studenteve ferizajas e kosovare që ta ndjekin programe studimi në Shtete e Bashkuara, për ngritur aftësitë profesionale e udhëheqëse. Jemi të bindur se mbështetja e pakursyer e popullit amerikan, përmes USAD-it do të vazhdojë edhe më tej, për të përmirësuar kushtet e jetesës së ferizajasve, për të ngritur cilësinë e shkollimit, për të rritur kapacitete demokratike të qeverisjes dhe për të ndikuar pozitivisht në zhvillimin e gjithmbarshëm të shoqërisë”, ka thwnw Svarqa.
Zyrtarë të kësaj organizate më pas kanë vizituar Gjykatën Themelore në Ferizaj, për të ndjekur nga afër një seancë gjyqësore të simuluar rreth një kontesti pronësor, organizuar nga studentë të juridikut, ndërsa më pas është mbajtur edhe një aktivitet tjetër, një tryezë me gratë asamblistë me temën "Iniciativa: nënat vetushqyese në Komunën e Ferizajt" organizuar për këtë jubile nga grupi i grave deputete dhe NDI-ja.
Investime e programe të larmishme zhvillimore
