Në Ferizaj është mbajtur sot konsultimi publik për plotësim-ndryshimin e Strategjisë për Zhvillimin dhe Fuqizimin e Rinisë, dokument që synon avancimin e politikave dhe programeve në mbështetje të të rinjve të komunës.
Sipas udhëheqëses së Sektorit të Rinisë në Ferizaj, Dashurije Ahmeti, shtojca e strategjisë synon të përforcojë zbatimin e Strategjisë për Zhvillimin dhe Fuqizimin e Rinisë në Komunën e Ferizajt përmes integrimit të parimeve të agjendave ndërkombëtare “Rinia, Paqja dhe Siguria” (Youth, Peace and Security – YPS) dhe “Gratë, Paqja dhe Siguria” (Women, Peace and Security – WPS).
Këto agjenda të Kombeve të Bashkuara theksojnë rëndësinë e përfshirjes aktive të të rinjve dhe grave në vendimmarrje, ndërtimin e paqes dhe zhvillimin e qëndrueshëm të komuniteteve.
“Integrimi i këtyre parimeve në nivel lokal kontribuon në krijimin e një mjedisi më të sigurt dhe më gjithëpërfshirës për të rinjtë dhe të rejat. Po ashtu, ndihmon institucionet komunale të harmonizojnë politikat dhe programet e tyre me standardet ndërkombëtare dhe praktikat më të mira në fushën e fuqizimit të rinisë dhe barazisë gjinore.
Agjenda ‘Rinia, Paqja dhe Siguria’ (YPS) u themelua përmes Rezolutës 2250 të Këshillit të Sigurimit të Kombeve të Bashkuara dhe thekson rolin e rëndësishëm të të rinjve në parandalimin e konflikteve dhe promovimin e paqes. Ajo bazohet në pesë shtylla kryesore: pjesëmarrjen, mbrojtjen, parandalimin, partneritetin dhe riintegrimin. Këto parime synojnë të sigurojnë që të rinjtë të kenë mundësi reale për të kontribuar në zhvillimin e komuniteteve të tyre dhe të jenë pjesë aktive e proceseve vendimmarrëse”, është shprehur Ahmeti.
Sipas saj, në mënyrë të ngjashme, agjenda “Gratë, Paqja dhe Siguria” (WPS) promovon fuqizimin e grave dhe vajzave, si dhe garantimin e pjesëmarrjes së tyre në proceset e paqes dhe qeverisjes. Kjo agjendë përqendrohet në mbrojtjen nga dhuna, promovimin e barazisë gjinore dhe përfshirjen e grave në proceset e zhvillimit dhe vendimmarrjes në të gjitha nivelet.
“Integrimi i këtyre agjendave në strategjinë komunale për rininë përbën një hap të rëndësishëm drejt përmirësimit të politikave lokale dhe rritjes së ndikimit të tyre në komunitet. Në këtë kuadër rekomandohet forcimi i pjesëmarrjes së të rinjve në proceset vendimmarrëse përmes konsultimeve të rregullta, përfshirjes në mekanizmat rinorë dhe bashkëpunimit me organizatat rinore dhe Këshillin Rinor Lokal”, tha Ahmeti.
Gjatë prezantimit të këtij dokumenti, Ahmeti theksoi se një element tjetër i rëndësishëm është përforcimi i masave për sigurinë dhe mirëqenien e të rinjve. Sipas saj, institucionet lokale duhet të bashkëpunojnë me shkollat, organizatat e shoqërisë civile dhe institucionet e sigurisë për të parandaluar dhunën, bullizmin dhe diskriminimin në shkolla dhe hapësira publike.
Dokumenti do të qëndrojë në konsultim publik deri më 20 qershor, duke u ofruar qytetarëve dhe palëve të interesit mundësinë që të japin komentet dhe sugjerimet e tyre për përmirësimin e mëtejshëm të strategjisë.
