Bazuar në shifra, brenda periudhës nëntë mujor kanë qenë diku 93 prona publike të uzurpuara, prej të cilave komuna ia ka dalë që t’i liroj 82 prona. Zyrtarë komunal nga Drejtoria për Pronë, Gjeodezi dhe Kadastër kanë thënë se vetëm gjatë kësaj jave kanë intervenuar në lirimin e pronave të uzurpuara në vetë zonën e qytetit, për t’i hapur rrugë kështu realizimit të projekteve të parapara infrastrukturore.
"Uzurpimet përbëjnë një problem në vete kur dihet se i tërë dokumentacioni valid ndodhet në Serbi. Kjo na ka sjellur probleme, por ne jemi duke bërë përpjekje që me atë dokumentacion që kemi ta zbatojmë. Presim që deri ka fundi i vitit ta kemi dokumentacionin valid", ka thënë drejtori i DPGJK, Fatmir Azizi.
Për më tepër bëhet e ditur se rastet e uzurpimeve më të theksuara janë në zonën e qytetit se sa në ato rurale, mu për faktin se kostoja e pronave në qytet është më e lartë, të cilat edhe sjellin probleme.
"Vetëm gjatë ditës kemi intervenuar në lirimin e disa pronave të cilat kanë penguar realizimin e një projekti rrugor. Qytetarët e kanë kuptuar se pronat publike nuk janë të tyre dhe në të shumtën e rasteve me mirëkuptim vetë i lirojnë ato", ka shtuar Azizi.
Veç uzurpimeve, komuna e Ferizajt ka probleme edhe me shpronësimin e pronave private për nevojat e komunës, e të cilat kanë një kosto të lartë. Zyrtarët kanë thënë se në lëmin e shpronësimeve gjithsejtë këtë vit kanë qenë 9 lëndë, 6 prej të cilave janë kryer, ndërsa tri janë në fazën e vlerësimit nga gjykata.
"Është e vërtetë që ka mungesë buxheti kur janë në pyetje shpronësimet, por po planifikojmë që për vitin e ardhshëm ta rrisim buxhetin për shpronësime, nisur nga fakti se ka kërkesa të shumta për rregullimin e rrugëve sidomos për hapjen e tyre e që duhet buxhet", ka thënë drejtori Fatmir Azizi, për të shtuar se këtë vit nuk ka ngecje të asnjë projekti infrastrukturor që ka ardhur si pasojë e mungesës së mjeteve për shpronësim.
Gjatë këtij viti komuna e Ferizajt është përballur me raste të shumta të uzurpimeve të pronave publike.
