Në ceremoninë e organizuar me ketë rast, betimin e kanë bërë edhe 41 këshilltarë të Asamblesë komunale .
Kryetari i ri i Komunës së Ferizajt, Muharrem Svarqa këtë të martë ka bërë betimin para asambleistëve të rinjë të Ferizajt. Menjëherë pas bërjes së betimit, Sfarça u është drejtuar të pranishmëve me një fjalë rasti me ç ’rast ka theksuar se marrja e përgjegjësisë së të parit të qytetit është një moment tepër i veçantë për secilin njeri.
Ai njëherësh ka falënderuar familjarët e tij për ndihmën që i kanë dhënë, duke shprehur mirënjohjen gjithashtu edhe për simpatizantët partiakë.
“Sot nga ky vend, solemnisht tanimë në cilësinë e kryetarit të komunës u premtoj të gjithëve, ama bash të gjithëve që do të jemi bashkë në punën tonë drejt progresit dhe suksesit të qytetit tonë, pavarësisht sfidave me të cilat do të përballemi në të ardhmen. Unë pra zotohem se premtimet e dhëna për zgjidhjen përfundimtare, institucionale të çështjeve e probleme të ushtarëve të UÇK-së, dhe të të gjitha kategorive të tjera të dala nga lufta do t’i bëj realitet. Por ne nuk do ti harrojmë as problemet e shumta të arsimit, shëndetësisë, pensionistëve e të kategorive të tjera sociale dhe as ato infrastrukturore, të cilat presin zgjidhjen e tyre”, është shprehur kryetari Svarqa, duke theksuar se rëndësi të veçantë do t’u kushtohet sidomos të rinjve, nxënësve dhe studentëve për të cilët kemi programe që lidhen me kultivimin dhe materializimin e dijeve të tyre deri te punësimi dhe mirëqenia e tyre e përgjithëshme.
“Unë do të punoj për përmbushjen dhe realizimin e ideve përparimtare e inovative të të rinjve tanë. Në mandatin tim qeverisës, vend të veçantë do të kenë ekspertët, profesionistët dhe intelektualët e qyetit tonë, pa të cilët Ferizaj dhe shoqëria jonë nuk mund të ecën përpara. Dija e tyre do të jetë vendimtare për ecjen tonë drejt qëllimeve të përbashkëta. Së bashku edhe me krjuesit, punëtorët e kulturës e të artit, me publicistët e gazetarët dhe me mediumet e pavarura do të jenë forca motorike e krijimit të mentalitetit dhe opinionit qytetarë, publik drejt progresit e zhvillimit që ne synojmë. Zhvillimi i qytetit tonë, progresi dhe suksesi ynë i përbashkët për ndryshimin e pamjes së qytetit dhe kualitetit të jetës sonë, varet edhe nga zhvillimi i veprimtarive afariste dhe bizneseve të afaristëve tanë. Afaristëve të suksesshëm ferizajas do t’u krijojmë klimë të favorshme dhe mundësi, lehtësira e favore për zgjerimin dhe rritjen e veprimtarive të tyre biznesore që lidhen drejtpërdrejt me hapjen e vendeve të reja të punës, sepse rritja e tyre është rritje e qytetit tonë”, ka potencuar Svarqa.
Gjatë bërjes së betimit, kryetari Svarqa ka ftuar të gjithë që të bëhen pjesë përbërëse e vendimmarrjes, jo vetëm nga përfaqësuesit legjitim që janë ulur në sallën e Kuvendit të Komunës, por edhe përmes takimeve, tubimeve e debateve të përbashkëta që të realizohen të gjithë me transparencë maksimale në dobi të këtij qyteti.
“Nga ju presim debate të hapura, të sinqerta dhe konstruktive e mbi të gjitha marrje të vendimeve të drejta dhe në interes të qytetarëve dhe të komunës sonë. Dhe unë ju garantoj se vendimet tuaja do të zbatohen me përpikmëri nga pushteti ynë ekzekutiv”, është shprehur Svarqa.
Kryetari i posazgjedhur i Ferizaj, Muharrem Svarqa i është drejtuar edhe partive opozitare në Kuvendin e Komunës.
“Nga ju pres zërin kritik, në hapsirën e mjaftueshme që do të krijohet për ju, sepse pa zërin kritik dhe konstruktiv të një opozite të fortë, nuk do të ketë as pozitë të fortë. Andaj ju ftoj edhe juve që të gjithë bashkë të luftojmë për faktorizimin e qytetit tonë në shtetin e pavarur të Republikës së Kosovës, sepse Ferizaj e meriton këtë: sepse këtë e meritojnë njerëzit e mirë të këtij qytetit të bukur”, tha Svarqa.
Numri një i qytetit të Ferizajt, Muharrem Svarqa ka falënderuar edhe kryetarin e gjertanishëm të komunës së Ferizajt, Agim Aliun për angazhimin e tij në interes të këtij qyteti.
“Unë ftoj që bashkë me ish-kryetarët e tjerë të bëhet pjesë e ekipit tim konsultativ dhe këshillëdhënës, sepse ne duhet ta ndërtojmë traditën e mirë që kuadrat në momentin e përfundimit të përgjegjësive të tyre të bartin përvojat e tyre tek pasuesit e tjerë, duke vazhduar të jenë persona të rëndësishëm për qytetin dhe qytetarët e komunës sonë”, ka përfunduar Svarqa.
Gjatë mbledhjes përuruese, me 25 vota pro, Milazim Haliti i LDK-së, u zgjodh kryesues i Kuvendit të Ferizajt, duke dalë fitues ndaj kundërkandidatit të tij të propozuar nga PDK-ja, Mustafë Grainca,i cili mori 16 vota të kuvendarëve .
Në prani të ish –drejtuesve të qeverisë lokale, këshilltarëve komunalë, drejtuesve të organizatave të dala nga lufta e UÇK-së , dhe bashkësive të tjera lokale, në mbledhjen inauguruese të Kuvendit komunal të Ferizajt është betuar kryetari i ri i komunës së Ferizajt,Muharrem Svarqa.
