Të nderuar bashkëqytetarë të komunës sonë, të nderuar besimtarë të besimit islam. Kam nderin që t’ju uroj nga zemra festën e Fiter Bajramit të gjithëve pa dallim me besimin dhe bindjen e plotë se kjo festë me simbolikë të fuqishme do të na gjejë më të bashkuar se kurrë më parë, të pajtuar dhe tolerantë pa marrë parasysh dallimet që kemi mes nesh dhe me sofra të begatuara për fëmijët, familjet dhe miqtë tanë. Sinqeriteti, pastërtia shpirtërore, toleranca dhe solidarizimi me njëri tjetrin janë virtyte të larta njerëzore dhe për të cilat ne shquhemi si komb, prandaj edhe festa si kjo është vetëm konfirmim i radhës i të gjitha vlerave njerëzore dhe shpirtërore me të cilat jemi të brumosur tradicionalisht. Në mënyrë të veçantë komuna e Ferizajt shquhet për jetë të përbashkët pa dallim ngjyre, etnie, përkatësie fetare, gjinie e çfarëdo statusi tjetër social, prandaj unë uroj nga zemra që të vazhdojmë me traditën e mirë për të ndërtuar një bashkësi në të cilën nuk kanë vend fjalët diskriminim, nënçmim, refuzim e tjerë.
Edhe këtë vit, edhe këtë muaj të shenjtë, përveç obligimeve fetare ka pasur solidarizim shumëdimensional, sidomos në aspektin social për të ndihmuar të varfrit. Dëshiroj të falënderoj posaçërisht kompanitë HIB Petrol, Eli Ab dhe bashkatdhetari ynë i nderuar Musli Murseli të cilët kanë kërkuar ndihmën e DSHMS-së për identifikimin e familjeve në nevojë dhe kanë ndihmuar skamnorët. Nuk dëshiroj tu hyj në hak të gjithë donatorëve tjerë eventual, qofshin organizata humanitare apo individë të cilët kanë gjetur forma alternative për të ndihmuar dhe që meritojnë falënderimin dhe respektin tonë.
Edhe ne si komunë nuk kemi qëndruar duarkryq, por u kemi ndihmuar 150 familjeve skamnore në nevojë duke u zgjatur kështu dorën e përkrahjes dhe ndihmës.
Unë edhe njëherë, duke shprehur konsideratat më të larta për të gjithë ata që u flijuan për këtë vend, për jetë e festim të lirë të të gjithë neve, për të gjithë ata që kontribuan dhe vazhdojnë të kontribuojnë për jetë më të mirë, ju uroj festën duke ju dëshiruar paqe, lumturi dhe mirëkuptim reciprok.
Sinqerisht,
Agim Aliu
Faleminderit!
Në mesazhin e kryetarit Aliu thuhet se sinqeriteti, pastërtia shpirtërore, toleranca dhe solidarizimi me njëri tjetrin janë virtyte të larta njerëzore dhe për të cilat ne shquhemi si komb, prandaj edhe festa si kjo është vetëm konfirmim i radhës i të gjitha vlerave njerëzore dhe shpirtërore me të cilat jemi të brumosur tradicionalisht.
