Në hapjen e këtij takimi konsultativ me banorët e rajonit të parë urbane, Kryetari i Ferizajt, Agim Aliu, ka thënë se projektbuxheti është dokumenti më i rëndësishëm dhe se prekë drejtpërdrejt jetën e tyre. Në ekspozenë e paraqitur, kreu i komunës tha se në vitin 2014 parashihen disa projekte shumë të rëndësishme me të cilat synohet që Ferizajn ta shndërrojnë në qendër urbane. Kryetari i komunës tha se në buxhetin e këtij viti janë paraparë 7 milion investime kapitale, ndërkaq për vitin e ardhshëm parashihen 9 milion euro investime.
“Pa dyshim se është dokumenti më i rëndësishëm për faktin se përcakton, projektet zhvillimore për qytetin e Ferizajt të cilat janë të rëndësishme jo vetëm për këtë periudhe kohore, por edhe për një periudhë shumë të gjatë për faktin se koncepti, filozofia e tyre është më i gjatë, prandaj edhe projektet që ne jemi duke i promovuar natyrisht jemi duke i bërë pjesë të projektbuxhetit 2014-2015 dhe është pikërisht ai vizion, që ne kemi për qëllim mbështetjen më të rëndësishëm të Republikës së Kosovës, por këtë dokument të rëndësishëm e bënë pjesëmarrja dhe participimi qytetarë me sygjerimet, idetë që kanë të bëjnë me buxhetin se çka ata dëshirojnë”, ka thënë Kryetari Agim Aliu.
Kryetari i Ferizajt, Agim Aliu, është shprehur se nga këto takime që po zhvillon me qytetarë sheh nga afër edhe problemet dhe brengat me të cilat preokupohen qytetarët ferizajas, por janë edhe idetë e vet qytetarëve lidhur me projektet që ata propozojnë. Ai në këto takime ka prezantuar edhe projektet që Komuna e Ferizajt tashmë është në vlugun e punimeve siç është rruga “Rexhep Bislimi”, rrugë kjo e cila do të bëhet me katër korsi, rregullimi i Qendrës së Qytetit, por edhe projekte të tjera infrastrukturore që po zhvillohen gjatë këtij viti si dhe projekte të cilat do të fillojnë këtë vit dhe do të vazhdojë realizimi i tyre edhe në vitin e ardhshëm.
Nga ana tjetër banorët e rajonit të parë të qytetit, kanë parashtruar kërkesat e tyre nga më të ndryshme, por kishe të atillë që interesoheshin edhe për projekte të cilat kanë filluar, por pritet edhe të fillojnë në të ardhme të afërt.
“Deshëm një sqarim nga kryetari nëse mund të na e japë për shkollën “Jeronim de Rada” që do të kalojë në objektin e shkollës së mesme ekonomike. A është paraparë që të rrënohet kjo shkollë, apo çka do të bëhet me të?”, ka thënë qytetari Xhevat Aliu.
“Për këtë fazë që po flasim, në vitin në të cilin jemi, po e bëjmë mësimin me dy ndërrime në shkollën “Jeronim de Rada”. Ndoshta jo nga një shtatori për shkak të disa vonesave që janë duke ndodhur në ndërtimin e shkollave të mesme ekonomike dhe shkollës së kompetencës atje tek kompleksi arsimor, por këtë vit sigurisht nga tetori do të fillojë dhe ne jemi të lumtur për këtë”, u përgjigje kryetari i komunës Agim Aliu.
“Ne kemi një shqetësim për mungesën e varrezës, sepse aty ku e kemi pasur deri tani në lagjen e Sherretëve, është mbyllë sepse nuk ka vend më, keni ndonjë projekt për këtë çështje?”, pyeti një tjetër qytetar
“Çështja e varrezës është më e ndjeshmja për gjithë qytetin e Ferizajt dhe më vjen mirë që e ke bërë këtë pyetje për faktin se mua më vjen keq që Kuvendi i Komunës në një nga seancat e fundit nuk e ka trajtuar me kujdesin e shtuar këtë çështje dhe më vjen keq që i ngatërrojmë agjendat politike me agjendat e interesave të qytetarëve.”, u përgjigje kryetari Aliu.
Ndërsa banorët e rajonit të dytë në takimin që kanë zhvilluar me Kryetarin e Komunës së Ferizajt,Agim Aliun, kanë parashtruar pyje nga më të ndryshmet.
“Çka do të bëhet në rrugën “Gjergj Fishta”nuk ka as kanalizim as ujësjellës?”, ka thënë Ahmet Maloku, banor i kësaj ane.
“Sigurisht se ky do të jetë njëri nga projektet që do të hy në projektbuxhetin e vitit 2014-2016 dhe do të realizohet konform standardeve”, është përgjigjur Kryetari Aliu.
“Rruga Lulzim Guta, është shumë e ngushtë dhe ngushtimi i kësaj rrugë a është bërë nga ana e qytetarëve apo ashtu duhet të jetë?”, pyeti Gëzim Boshnjaku.
“Në javën e ardhshme do të del gjeodetet dhe do të vendosin pika dhe të shohim se çka është duke ndodhur me rrugën Lulzim Guta”, është përgjigjur Drejtoresha e Urbanizimit dhe Mjedisit Qazime Vata.
Takime të tilla me banorët e komunës së Ferizajt, do të mbahen në të katër rajonet e qytetit dhe në të gjitha bashkësitë lokale të fshatrave deri të hënën e ardhme. Gjatë ditës së sotme duke filluar nga ora 16:00 Kryetari Agim Aliu, do të takohet me qytetarët e rajonit të trete në shkollën “Astrit Bytyqi”ndërsa nga ora 18:00 do të takohet me qytetarët e zonës së katër në shkollën “Ganimete Tërbeshi” në Ferizaj.
Numri një i Qeverisë Lokale të Ferizajt, Agim Aliu, së bashku me Drejtorin e Drejtorisë së Financave Mustafë Graincën dhe Drejtoreshën e Urbanizmit dhe Mjedisit Qazime Vata, kanë filluar takimet konsultative me qytetarët e rajonit të parë dhe të dytë të qytetit për të diskutuar rreth hartimit të buxhetit për vitin 2014-2016.
