Kryetari i Komunës së Ferizajt, Agim Aliu gjatë ditës së sotme ka pritur në takim Kryeministrin e Republikës së Kosovës, Ramush Haradinaj. Në këtë takim mysafirë ishte edhe zv.ministri i zhvillimit ekonomik, Xhavit Zariqi, deputeti i Parlamentit të Republikës së Kosovës, Elmi Reçica, kryesuesja e Kuvendit të Komunës, Kristina Gashi-Bytyqi, nënkryetari i komunës Naim Ferati si dhe mysafirë të tjerë.
Në këtë vizitë të Kryeministrit Haradinaj u diskutuan shumë çështje të rëndësishme për Ferizajn, veçanërisht mbështetjen e Qeverisë së Republikës së Kosovës për Komunën e Ferizajt në fushën e ekonomisë, arsimit, shëndetësisë, infrastrukturës dhe fusha të tjera.
Kryetari Aliu u shpreh falënderues ndaj Kryeministrit Haradinaj për vizitën e sotme dhe mbështetjen e vazhdueshme nga Qeveria e Republikës së Kosovës, si dhe siguroi Kryeministrin se Ferizaj përkundër gjendjes së rëndë financiare, do t’ia dal të realizoj projektet e saja zhvillimore në dobi të interesit të përgjithshëm qytetar.
“Folëm për shumë projekte të cilat janë futur dhe të kenë një dinamikë krejtësisht të re dhe ndryshe nga më parë por njëkohësisht folëm që dalëngadalë të jenë pjesë e buxhetit shumë projekte strategjike që kanë të bëjnë me Ferizajn. Ne, po ashtu folëm edhe për vet sfidat e qeverisë lokale, sfida të cilat nuk janë të pakta, për faktin se ne, si kryetar të rinj të komunave, kemi trashëguar një gjendje jo të mirë financiare, një keqmenaxhim, keqplanifikim, por edhe me shumë obligime, por sigurisht që pas kësaj kërkesë që ne i bëmë kryeministrit, sigurisht se do të studiohen mundësitë që komunat e Republikës së Kosovës, por edhe Ferizaj që është njëra ndër komunat që ka pasur keqmenaxhimin më të lartë në nivel të Republikës së Kosovës, të mos kemi më shembuj të tillë, por të kemi një disiplinë të qëndrueshmërisë së projekteve dhe mbi të gjitha kjo është edhe obligim, për faktin se tashmë shumë operatorë ekonomik janë futur në obligime dhe disiplina financiare në radhë të parë do të ishte një ndihmesë ndaj komunitetit të biznesit”, është shprehur kryetari Aliu.
Në anën tjetër, Kryeministri Haradinaj u shpreh falënderues për pritjen e organizuar nga kryetari Aliu dhe garantoi se mbështetja e Qeverisë së Republikës së Kosovës për Komunën e Ferizajt do të vazhdoj edhe më fuqishëm duke pasur parasysh gjendjen e rëndë financiare në të cilën po kalon.
“Kryetarët paraprak pa pas fare buxhet, pra me 10.000€ duke zotuar vetëm 10.000€ kanë hyr në projekte që kanë vlerë 5 milion €. Ato janë tani borxhe të ngarkuara për të gjitha komunat dhe ka këso raste në të gjitha komunat e vendit ndoshta duhet qeveria ta bëj një plan që të ballafaqohet me këtë t’i marr këto përgjegjësi tani dhe ti shkarkon komunat pra që mos të jenë komuna gjatë gjithë vitit që vijnë të ngarkuara me këtë presion të borxheve e të mos munden t’iu përgjigjen kërkesave të qytetarëve”, ka thënë Kryeministri Haradinaj, përderisa ka shtuar se kujdes të veçantë në realizimin e shumë projekteve do t’i kushtoj edhe Komunës së Ferizajt.
Vizita e sotme e Kryeministrit ka vazhduar me adresimin e këtij të fundit para asambleistëve komunal, qytetarëve si dhe ka përfunduar me vizitën në zyren qendrore të kompanisë HIB Petrol – taksapaguesit më të madh në Republikën e Kosovës, biznes ky me pronarë ferizajas.
