Kryetari i Komunës së Ferizajt,Agim Aliu, këtë të mërkurë ka pritur në një takim volejbollistët e “AKPA TE LUZHA” pas sukseseve të arritur, ku kanë fituar kupën e Republikës së Kosovës në volejboll.
Kryetari Aliu, ka inkurajuar dhe ka përgëzuar kryesinë e këtij klubi për fitoren e korrur. Volejbollistët e “AKPA TE LUZHA ” më këtë rast kanë dorëzuar edhe trofeun e fituar, Kryetarit të Ferizajt, Agim Aliut.
“Definitivisht edhe një herë po sjellim dëshminë se klubet sportive ferizajase, çdo ditë janë në majet e prezantimeve sportive dhe neve na vjen mirë jashtëzakonisht shumë, që po kemi suksese të tilla si klube ferizajase. Me këtë rast unë dua të përgëzojë në radhë të parë udhëheqësin e klubit “AKPA TE LUZHA” në krye me Kemajl Luzhën dhe po ashtu, trajnerin me gjithë lojtarët që me mundin dhe djersën e tyre kanë mundësuar që të fitohet trofeu”, ka thënë kryetari Aliu.
Kryetari Aliu është shprehur se rezultate të reja pret nga ky klub edhe nga ndeshja e nesërme që do të zhvillojë ky klub në mënyrë që të bëhet edhe kampion në nivel të Republikës së Kosovës.
“ Ajo që mund të them si Kryetar, ashtu siç kam thënë edhe më parë, ne do të shtojmë mbështetjen për klubet e suksesshme, siç e kemi bërë në të kaluarën edhe për klubet tjera, por në mënyrë të veçantë, do i mbështesim ato klubet që kanë rezultate dhe pa dyshim njeri ndër ato klube do të jetë edhe “AKPA TE LUZHA” me rezultate më të mëdha të viteve të fundit që ka pasur ky ekip”, është shprehur Aliu.
Ndërsa Kemajl Luzha nga klubi i volejbollistëve “AKPA TE LUZHA”, është shprehur mirënjohës ndaj Kryetarit të Ferizajt Agim Aliut, për përkrahjen që ka bërë Komuna e Ferizajt.
“Këto rezultate janë arritur në bazë të ndihmës dhe përkrahjes së Kryetarin e Komunës, kupën e fundit ja sjellim Kryetarit dhe shpresoj se edhe kupën e kampionit do t’ja dorëzojmë, pasiqë e kemi shumë afër”, është shprehur Luzha.
Gjatë këtij takimi Kryetari i Komunës së Ferizajt, Agim Aliu, ka bërë të ditur se në vitin 2014 do të ndahet edhe një buxhet i caktuar edhe për ndërtimin e një sallë sportive e cila do të shërbeje për klubet ferizajase, por edhe për nxënësit e shkollave të Ferizajt.
Kryetari i Ferizajt, Agim Aliu ka pritur në një takim volejbollistët e “AKPA TE LUZHA” nga Ferizaj, kryesinë e këtij klubi dhe shtabin teknik, për t’i përgëzuar për suksesin që kanë shënuar ditë më parë.
