Ministria e Administrimit të Pushtetit Lokal e ka vlerësuar Komunën e Ferizajt, gjegjësisht Kryetarin e Komunës Bajrush Xhemailin, se të gjitha vendimet që janë marruar nga vet Kryetari dhe Kuvendi i Komunës janë legjitime. Sipas drejtorit të Drejtorisë së Administratës dhe Personelit në Ferizaj, Vesel Zhinipotokut, kjo është bërë e ditur në raportin tre mujor të kësaj ministrie i cili është hartuar në bazë të monitorimit të seancave të Kuvendit Komunal, analizimit të dokumenteve të ndryshme dhe bashkëpunimi me kryesuesin e Kuvendit , drejtorët e administratës si pika kontaktuese të kësaj ministrie si dhe të zyrtarëve komunale.”Në raportin e kësaj ministrie thuhet se Kuvendi Komunal ka funksionuar normalisht, nuk ka pasur raste të bojkotimit të seancave nga ndonjë subjekt politik apo anëtar i Kuvendit. Sa i përket njoftimeve për mbledhjen e kuvendit, komuna i ka dërguar ftesat me kohë, ashtu siç e parashihet me Ligjin për vetëqeverisje lokale si dhe materialin përcjellës që shqyrtohet në mbledhjen e kuvendit”, ka thënë Zhinipotoku.
Komuna e Ferizajt, gjatë kësaj periudhe tre mujore ka miratuar 16 vendime dhe 1 rregullore. Në bazë të këtij raporti thuhet se Komiteti për Politike dhe Financa në komunë tonë ka funksionuar normalisht. Zyrtarë të ministrisë së Administrimit të Pushtetit Lokal , po ashtu kanë vlerësuar se gjatë kësaj periudhe edhe Komiteti për Komunitete ka funksionuar normalisht. Drejtori i Drejtorisë së Administratës dhe Personelit, Vesel Zhinipotoku, ka thënë se komuna është vlerësuar nga kjo ministri edhe sa i përket miratimit të propozim buxhetit për vitin 2012 si dhe projeksioneve buxhetore për vitin 2012-2014, si dhe Rregulloren për tatimin në pronë për vitin 2012.”Për këto çështja komuna ka zhvilluar dëgjime publike me qytetarët, në përputhje me qarkoren buxhetore të nxjerrë nga Ministria e Financave”, është shprehur drejtori Zhinipotoku.
Në raport po ashtu thuhet se Komuna gjatë kësaj kohe ka miratuar edhe një numër të konsiderueshëm të vendimeve.”Ndër vendimet më të rëndësishme që ka miratuar Kuvendi i Komunës së Ferizajt, janë edhe vendimet për shpalljen e interesit të përgjithshëm të disa ngastrave kadastrave që menaxhohet nga AKP”, tha Zhinipotoku.
Qëllimi i shpalljes me interes të përgjithshëm të këtyre ngastrave është ti kërkohet AKP-së këmbimi i këtyre ngastrave, me disa ngastra që janë pronë e Komunës në mënyrë që këto ngastra të përdoren me qëllim të zgjerimin e rrugëve, rregullimin e parkut të qytetit si dhe një pjesë të destinacioni me qëllim të destinimit për punë praktike për shkollën e mesme të bujqësisë.
Në raportin e kësaj ministrie thuhet se të gjitha vendimet që janë marrë në Kuvendin e Komunës janë të legjitime.
