Në sallën e Kuvendit të Komunës së Ferizajt është mbajtur sot një takim informues për nisjen e procesit të hartimit të Planit për Shërbime Sociale, dokument i cili synon të identifikojë nevojat e qytetarëve dhe të përmirësojë planifikimin e ofrimit të shërbimeve sociale në komunë.
Në takim morën pjesë shefi i Kabinetit të Kryetarit të Komunës së Ferizajt, Albion Sherifi, drejtorë të drejtorive komunale, drejtoresha e Qendrës për Punë Sociale, përfaqësues të SOS Fshatrave të Fëmijëve, zyrtarë të Policisë së Kosovës, mbrojtës të viktimave, përfaqësues të organizatave joqeveritare si dhe zyrtarë të tjerë komunalë.
Duke hapur takimin, shefi i kabinetit, Albion Sherifi, theksoi rëndësinë e hartimit të këtij plani, duke e cilësuar atë si një dokument strategjik që do të ndihmojë në adresimin e nevojave sociale të qytetarëve dhe në koordinimin më të mirë të institucioneve përgjegjëse.
Nga ana tjetër, Remzije Krasniqi nga SOS Fshatrat e Fëmijëve informoi të pranishmit se një numër i madh komunash tashmë kanë filluar hartimin e planeve të tilla, me qëllim të identifikimit të nevojave reale të komunitetit dhe planifikimit të shërbimeve sociale në mënyrë më efikase.
Muhamet Jahiri nga Policia e Kosovës në Ferizaj vlerësoi se planifikimi i shërbimeve sociale është i domosdoshëm, duke theksuar se institucionet përballen çdo ditë me sfida të shumta në identifikimin dhe trajtimin e nevojave të grupeve të ndryshme të komunitetit.
Mbështetje për këtë proces shprehën edhe drejtori i Arsimit, Afrim Llabjani, si dhe drejtori i Zhvillimit Ekonomik dhe Turizmit, Balton Dërguti, të cilët theksuan rëndësinë e bashkëpunimit ndërinstitucional për hartimin dhe zbatimin e këtij plani.
Ndërkaq, drejtoresha e Qendrës për Punë Sociale në Ferizaj, Adelina Rexhepi-Braha, foli për sfidat me të cilat përballet ky institucion, duke theksuar se, pavarësisht vështirësive, Qendra vazhdon të ofrojë shërbime për rastet e dhunës në familje, delikuencës së të miturve, fëmijëve përdorues të substancave narkotike, si dhe për kategori të tjera në nevojë.
Gjatë diskutimeve, pjesëmarrësit dhanë ide dhe propozime konkrete lidhur me përmbajtjen dhe mënyrën e hartimit të Planit për Shërbime Sociale, duke nënvizuar se dokumenti duhet të shoqërohet me masa konkrete dhe të jetë i zbatueshëm në praktikë, e jo të mbetet vetëm një dokument formal.
Në përmbyllje të takimit, Dren Kukaj prezantoi gjendjen aktuale të shërbimeve sociale në Komunën e Ferizajt, bazuar në të dhënat e siguruara nga Qendra për Punë Sociale, organizatat e shoqërisë civile dhe analizat mbi nevojat e grupeve të ndryshme sociale. Ai paraqiti gjithashtu sfidat kryesore dhe prioritetet që do të shërbejnë si bazë për hartimin e Planit për Shërbime Sociale.
