Drejtori i Financave Mustafë Grainca, është shprehur tejet i kënaqur me nënshkrimin e këtyre kontratave, duke theksuar se kjo është ditë e veçantë, për faktin se janë nënshkruar kontrata investimore me bizneset tona të cilat kishin kërkuar që të marrin në shfrytëzim pronat e komunës. Sipas tij këto biznese para Kuvendit të Komunës dhe anëtarëve të komisionit kishin ofruar edhe planet investimore, plane këto të trajtuar në mënyrën e duhur dhe te vlersuara nga komisioni dhe si rekomandim te aprovuara me votim nga kuvendi i komunes.
“Ne ndamë 12 kompanive tona, mbi 6 hektarë tokë për të shënuar fillimin e krijimit te zonave ekonomike dhe këto zona ekonomike, nuk do të ndalen së funksionuari, sepse misioni yn institucional eshte perkrahja e bizneseve ne funksion te rritjes se kapaciteteve te tyre nga e cila do te derivohet gjenerimi i vendeve te reja pune.” ka thënë Grainca.
Marrëveshja e nënshkruar mes komunës dhe këtyre bizneseve në vete përmban edhe punësimin e shumë të rinjve.
“Tokat djerrina që i kemi në komunën tonë, po i shendërrojmë në fabrika me mundësi të hapjes së vendeve të punës, gjenerim të të ardhurave si dhe zhvillim te ekonomise se komunës sonë. Përmes këtyre kontratave ne nënshkruam marrëveshje se do të punësohen mbi 320 të papunë dhe do të kemi mbi 3.4 milion euro investime, që do të realizohen brenda vitit 2014 në këto zona ekonomike”, u shpreh Drejtori i Financave, Mustafë Grainca.
Ndërkaq përfituesit e këtyre kontratave, thonë se janë të sigurt që do t’u mbajnë zotimet e tyre.
“ Neve na i ka lehtësuar shumë, pasi disa prej nesh kemi qenë me qira, edhe tash në vend se të paguajmë qira, ne do të punësojmë njerëz”, tha përfituesi, Fehmi Krasniqi.
“Prona më shërben për ta ndërtuar një fabrikë ku do të bëhet përpunimi i kërpudhave. Gjithashtu do të hapen mundësi punësimi për të rinjtë, e sidomos për të rejat, sepse përparësi do të ketë gjinia femërore”, tha për përfituesja, Feride Aliu.
Grainca tha se në të ardhmen pritet që edhe shumë prona të tjera të jepen në shfrytëzim, të cilat në vitin 2010 nga Kuvendi Komunal, janë cilësuar si zona me interes të përgjithshëm për krijimin e zonave ekonomike.
Drejtori i Drejtorisë së Financave Mustafë Grainca, këtë të mërkurë ka bërë shpërndarjen e 12 kontratave që Komuna e Ferizajt, tashmë nënshkroi me bizneset përfituese ne procesin e ndarjes se pronave te komunes.
