Me këtë rast drejtori Grainca, është shprehur se vitit fiskal 2011, në fushën e të hyrave vetanake si dhe në atë të shpenzimeve buxhetore, është karakterizuar me ruajtjen e vazhdimësisë të ngritjes së trendit të të hyrave vetanake dhe me rritje të nivelit të efikasitetit në shpenzimet buxhetore.”Meqenëse ne ende nuk e kemi përmbyllur vitin fiskal 2011 për të përmbledhur raportin final të të hyrave vetanake, mbështetur në të hyrat e realizuara deri më 27 dhjetor në raport zyrtar, vijmë në një përfundim shumë të përafërt se organizata jonë buxhetore do të përmbyllë këtë vit, duke shënuar performancë të lartë në këtë segment të rëndësishëm buxhetor, duke inkasuar të hyra vetanake në vlerë mbi 3 360 mijë euro, e cila tejkalon planin vjetor për 10 për qind dhe vitin fiskal 2010 për 11 për qind”, ka thënë Grainca.
Në këtë konferencë drejtori Grainca, ka vë në pah se hyre kryesore edhe këtë vit ka qenë nga tatimi në pronë.” Gjithnjë duhet potencuar në veçanti të hyrën primare tatimin në pronë i cili edhe këtë vit shënoi ngritje të vlerës së inkasuar duke tejkaluar planin për 24 për qind dhe vti 2010 për 2 për qind. Taksat e biznesit tejkaluan vitin 2010 për 9 për qind dhe planin për 7 për qind, të hyrat nga qerat tejkaluan vitin 2010 për 13 për qind dhe realizuam planin për 92 për qind, ndërsa taksat e ndërtimit shënuan një ngritje të lartë duke tejkaluar vitin 2010 për 114 për qind dhe planin për 18 për qind”, tha drejtori Grainca.
Drejtori Grainca ka thënë se gjatë këtij viti ka qenë një performancë e shkëlqyeshme edhe në përfitimin e granteve nga donatorë të jashtëm.” Gjatë vitit fiskal 2011 organizata jonë buxhetore, falë angazhimit të kryetarit të Komunës, pastaj njësisë së zhvillimit ekonomik, stafit administrativ, të drejtorisë së planifikimit dhe asaj të arsimit, performuan shkëlqyeshëm edhe në përfitimin e granteve nga donatorë të jashtëm si: granti nga Komisioni Evropian në vlrë prej 387 573 euro për zhvillimin e turizmit në komunën tonë në fokus funksionalizimin e bifurkacionit të lumit Nerodime, granti nga Komisioni Evropian për ndërtimin e stadiumit të qytetit në vlerë prej 600 mijë euro dhe grantin për renovimin e tri shkollave po ashtu i financuar nga Komisioni Evropian në vlere prej 880 mijë euro. Kemi arrit marrëveshje me CDI-në për të investuar e 5000 milion frangave në sistemin e ujësjellësit. Këto grante të përfituara gjatë vitit fiskal 2011 do të realizohen gjatë vitit fiskal 2012 dhe si të tilla shtuan gamën e investimeve kapitale në funksion të zhvillimit të gjithmbarshëm”, ka potencuar Grainca.
Numri një i Drejtorisë së Ekonomisë, Financave dhe Buxhetit Mustafë Grainca ka folur edhe rreth shpenzimeve buxhetore.” Organizata jonë gjithashtu në përmbyllje të vitit fiskal 2011 shënoi efikasitet të lartë në fushën e shpenzimeve buxhetore duke realizuar buxhetin në tersi nga dy burimet e financimit për 97.67 për qind. Granti qeveritar u shpenzua në të gjitha kategoritë ekonomike për 99.78 për qind , duke mbetur pa u shenzuar apo suficit vetëm 0.02 për qind nga totali i grantit qeveritar. Kjo e arritur ka përmbushur zotimet e kryetarit të Komunës se viti fiskal 2011 do të përmbyllet pa suficit apo me mbetje buxhetore në vlere fare simbolike krahasuar me vlerën e grantit”, është shprehur Grainca.
Të hyrat vetanake si burim i dytë i financimit të buxhetit këtë vit janë shpenzuar 85.58 për qind nga totali i planifikuar, ndërsa pjesa e mbetur do të bartet për shpenzimet në vitin vijues së bashku me vlerën e tejkaluar të të hyrave.”Ndërsa për shpenzimet nëpër kategoritë ekonomike, ato do të prezantohen në pasqyrën financiare meqenëse ne presim gjenerimin e plotë të raporteve analitike të shpenzimeve në fillim të vitit vijues përmes të cilave do të hartojmë edhe pasqyrën financiare për vitin 2011 dhe e cila sipas ligjit për menaxhimin e financave publike do të dorëzohet në ministrinë e financave me së largu deri më 31.01.2012”, tha Grainca.
Objektiva të Drejtorisë së Ekonomisë Financave dhe Buxhetit për vitin 2012 ,mbesin, hartimi i politikave në funksion të ngritjes së mëtejme të të hyrave vetanake, rritja e nivelit të efikasitet të shpenzimeve buxhetore, rritja e shpenzimeve kapitale, si dhe rritja e angazhimit për përfitimin e granteve nga donatorët potencial.
Drejtori i Drejtorisë së Ekonomisë, Financave dhe Buxhetit, Mustafë Grainca këtë të mërkurë ka shpalosur punën e tij njëvjeçare.
