Vendosja e kontejnerëve nëntokësor po bëhet nga një grant stimulues që ka fituar Komuna e Ferizajt nga USAID-i amerikan dhe Ministria e Administrimit të Pushtetit Lokal. Kryetari i Komunës së Ferizajt, Agim Aliu, realizmin e këtij projekti e ka cilësuar si të një rëndësie të madhe për qytetin e Ferizajt, për vet faktin që po fillohet një mënyrë e re e menaxhimit të mbeturinave.
“Sigurisht se kjo është vetëm faza e parë, por sigurisht se do të vazhdojmë edhe më tutje, sepse kemi përkushtimin dhe angazhimin permanent që përkushtimi jonë dhe ambienti jonë, të jetë sa më i pastër dhe praktikisht përmes këtyre kontejnerëve nëntokësor të mundësohet kjo”, ka thënë Aliu.
I pari i qytetit të Ferizajt, Agim Aliu, në prononcimin e tij para gazetarëve ka theksuar se edhe qytetarët duhet të kenë një kujdes më të shtuar gjatë hedhjes së mbeturinave.
“Sigurisht se në këto momente është i domosdoshëm edhe një apel për qytetarët tanë që të jenë më të kujdesshëm dhe të shfrytëzojnë këta kontejner nëntokësor në mënyrë që vërtet qyteti i Ferizajt të jetë një prej qyteteve më të pastërta në Republikën e Kosovës. Ne e kemi zgjedhur disa nga pikat më të zeza t’i quaj kështu, por do të zgjedhim edhe pika të tjera më mundësitë e ardhshme buxhetore në mënyrë që të sigurohet një përkujdesje më e madhe dhe permanente e mbeturinave”, është shprehur Aliu.
Nga ana tjetër Drejtori i Shërbimeve Publike Ibrahim Hyseni, ka thënë se funksionimi i këtyre kontejnerëve është mjaft i lehtë dhe shumë funksional.
“Kontejnerët nëntokësor i plotësojnë të gjitha standardet dhe kriteret e Bashkësisë Evropiane do të thotë në vendet më të zhvilluar janë kontejner të tillë. Kapaciteti i këtyre kontejnerëve është 3 metër kub, do të thotë një kontejner i këtij lloji i zëvendëson 3 kontejner klasik që kanë qenë deri më tash”, tha Hyseni.
Komuna e Ferizajt, është njëra prej komunave të parë në Republikën e Kosovës që ka filluar me këtë ide, ndërkaq një ide e tillë është bartut edhe në qytet tjera të Kosovës. Tash për tash kontjenrët nëntokësor do të vendosen në rrugët : “Dëshmorët e Kombit”, “Ahmet Kaqiku” si dhe në rrugën “12 Qershori”.
Këtë të hënë në qendër të qytetit të Ferizajt, është ndezur makineria për projektin e kontejnerëve nëntokësor, projekt ky i Komunës së Ferizajt. Ndezjen e makinerisë e bërë Kryetari I Komunës së Ferizajt, Agim Aliu së bashku me bashkëpunëtorët e tij.
