Kryetari i Komunës së Ferizajt, Muharrem Svarqa, këtë të martë ka pranuar raportin e fizibilitetit i cili do të shërbejë për trajtimin e ujërave të zeza në tërë territorin e komunës sonë. Svarqa këtë raport e ka vlerësuar si shumë të rëndësishëm.“Ne jemi shumë mirënjohës për realizimin e këtij projekti shumë të rëndësishëm për Komunën e Ferizajt, për shkak se në të gjitha bisedimet që kemi pasur edhe me partnerët e huaj, sidomos me investitorët evropian, pengesë për trajtimin e ujërave të zeza ka qenë mungesa e studimit të fizibilitetit, tani e tutje në bazë të këtij studimi, ne do të marrin hapat tonë konkret për trajtimin e ujërave të zeza dhe për mbrojtjen e ambientit që e kemi synim jo vetëm si pushtet komunal, por është pjesë e synimeve të qytetarëve, për shkak se të dhënat tona tregojnë se ne kemi 22 vende të mbledhjes së ujërave të zeza, nëpër lumejt e qytetit të Ferizajt”, ka thënë kryetari Svarqa, duke theksuar se në këtë raport janë të identifikuara tri vende ku bëhet edhe grumbullimi i këtyre ujërave si në Gurëz, Bablak dhe në Dardani.
“Ne do të krijojmë parakushte që përmes kolektorëve që do të futen këto ujëra të zeza do t’i mbrojmë lumejtë, ambientin, por do ta bëjmë edhe trajtimin e tyre dhe nuk do të kemi më pamje të shëmtuar të ujërave të zeza në natyrë që më shumë i ngjajnë liqejve artificial, që është si pasojë e mos trajtimit të këtyre ujërave gjer më tani”, është shprehur Svarqa.
Nga ana tjetër eksperti për infrastrukturë dhe mbrojtje të ambientit, Sohail Hassan, ka thënë se ishte kënaqësi shumë e madhe që të punohet në këtë raport të studimit të fizibilitetit për trajtimin e ujërave të zeza në Komunën e Ferizajt.
“Ky raport është punuar së bashku edhe me zyrtarë të ujësjellësit, dhe pa ndihmën e tyre nuk do të mund të ishte ky raport. Shpresojmë se ky raport i fizibilitetit, do të jetë bazë për ndërtimin e fillimit të projektit afatgjatë për Komunën e Ferizajt dhe shpresojmë se do të jetë një dokument i rëndësishëm i cili do t’ju shërbej juve në shfrytëzimin e granteve dhe kredive nga institucionet bankare”, ka thënë Hassan.
U bë e ditur se tash për tash rreth 85 për qind e ujërave të zeza grumbullohen në fshatin Gurëz, ku atje do të bëhet edhe ndërtimi i një fabrike e cila do të jetë për trajtimin e këtyre ujërave e cila sipas specifikacioneve dhe parallogarive pa llogaritën tatimin mbi vlerën e shtuar do të kushtojë rreth 18 milion euro, ndërsa realizimin i saj i tërësishëm dhe me kolektorë të kushtojë afër 22 milion euro.
Kryetari i Komunës së Ferizajt, Muharrem Svarqa i shoqëruar nga nënkryetari Xhavit Zariqi dhe drejtori i Shërbimeve Publike dhe Emergjencës, Fatmir Azizi, si dhe drejtori i Kompanisë së Ujit, Faton Frangu këtë të martë kanë pranuar raportin e fizibilitetit për trajtimin e ujërave të zeza.
