Një sërë aspektesh që kanë të bëjnë me nivelin e sigurisë në rajonin e Ferizajt janë diskutuar të premten në takimin e Këshillit Komunal për Siguri në Bashkësi (KKSB). Kryetari i Ferizajt, Bajrush Xhemaili, i cili udhëheq me këtë këshill dhe komandanti i Stacionit Policor të Ferizajt, toger Qazim Reka situatën e sigurisë e kanë vlerësuar të jetë stabile.
"Ferizaj sa i përket sigurisë vazhdon të jetë qyteti më i sigurt në Kosovë" ka theksuar kryetari Xhemaili. Ndërsa toger Reka ka bërë të ditur se rastet e dy grabitjeve që kanë ngjarë në Ferizaj, janë zgjidhur me arrestimin e personave të dyshuar, ndërsa njësitet e hetuesve policorë janë duke punuar në zbardhjen e edhe të dy rasteve tjera të vjedhjeve.
Çështja e rrugës kryesore të qytetit, e cila për disa ditë ishte mbyllur për të krijuar një frymëmarrje më të mirë për qytetarë dhe zhurma e kafiterive, kanë qenë dy çështje që janë rrahur në këtë takim.
Kryetari i Ferizajt, Xhemaili theksoi se iniciativa për mbylljen e rrugës kryesore "Dëshmorët e kombit" për qarkullim të automjeteve ka rrjedhur duke marrë parasysh opinionet e shumë qytetarëve dhe shoqërisë civile, por që më pas ka pasur reagime të pakuptimta të bizneseve, për gjoja ngecje të afarizmit të tyre, pikërisht nga mbyllja e kësaj rruge.
"Ka qenë qëndrim dhe jo vendim. Kjo është bërë pasi janë hapur rrugët anësore dhe kanë ekzistuar kushtet, për të krijuar një frymëmarrje më të mirë dhe për të integruar këtë rrugë me pjesën e parkut, për të bërë një shëtitore atraktive, por ka pasur reagime të bizneseve, që nuk kanë qenë reale. Nuk kanë pasur durim t’i presin rezultatet, dhe të mësohet me një rregull të ri" ka thënë Xhemaili, duke mos arsyetuar fare pohimet e bizneseve se është shënuar rënie të punës për shkak të mbylljes së qarkullimit.
Kryetari Xhemaili ka folur edhe për ankesat e qytetarëve që ka marrë dhe po merr rreth zhurmës që burimin e kanë nga disa kafiteri. Ai tha se vërtetë është një problem serioz, ndaj duhet vepruar sipas ligjit, i cili ndalon zhurmën. Ai tha se bashkë me autoritetet e policisë ka zhvilluar takime me pronarët e kafiterive, për t’ ua përcjell shqetësimet e qytetarëve, ndaj marrja e masave do të jetë e paevitueshme, për gjithë ata që nuk respektojnë orarin e paraparë të lejimit, deri në ora 22, përkatësisht 23 gjatë vikendeve.
Anëtarë të këtij këshilli kanë ngritur edhe çështjen e prerjeve ilegale të pyjeve, mbeturinave, deponive ilegale, sigurisë në shkolla dhe shumë çështje tjera që kanë të bëjnë me sigurinë dhe rendin publik.
KKSB në Ferizaj mban takimin e rregullt, diskutohen aspekte të shumta të sigurisë dhe rendit publik
