Nën patronatin e kryetarit të Komunës së Ferizaj, Bajrush Xhemailit, për të 39 herë me radhë mbrëmë në Ferizaj, është mbajtur Festivali i muzikës popullore, festival ky tradicional” Kosovarja këndon”.Me këtë rast ky festival është vlerësuar i një rëndësie të madhe duke theksuar faktin se për 39 vjet me radhë ka qenë një rrugëtim i gjatë dhe me sfida të shumta, vite të kaluara me lot e herë me buzëqeshje dhe herë të tjera me emocione të përziera, por gjithmonë krenar dhe ballëhapur.
Qyteti i Ferizajt Festën e flamurit dhe përvjetorin e pavarësisë së shteti shqiptar e ka festuar nën ritmin e këngëve popullore, që kanë sjellur vajzat e talentuara nën përcjelljen e orkestrës profesioniste “Kastriotët” nën udhëheqjen e profesorit të mirënjohur Fahri Beqiri. Profesori Fahri Beqiri për tri dekada ka udhëhequr dhe organizuar festivalin “Kosovarja këndon’, ndërsa e kanë ndihmuar edhe dirigjentja Lindita Isufi dhe Fitim Bytyqi nga orkestra “Kastriotët”.
Hapjen e Festivalit “Kosovarja këndon” e ka bërë kryetari i Komunës së Ferizajt, Bajrush Xhemaili, i cili e ka vlerësuar këtë festival si një vlerë të madhe për qytetin tonë, duke theksuar se më këtë festival Ferizaj njihet si qytet i kulturës, ku për 39 vjet me radhë organizohet një festival i tillë.
Në këtë festival morrin pjesë 15 vajza, ndërsa jurinë e festivalit e përbenin, Sanije Matoshi- soprano dhe profesoreshë e muzikës, Astrit Mustafa profesor si dhe Selami Kolonja këngëtar dhe profesor. Me këtë rast juria ka vlerësuar dhe ka zgjedhur edhe më të mirat e këtij festivali, ku me çmimin e parë është nderuar Ardita Uka me këngën “Ishe Vogëlushe, me vendin e dytë i takoi Liridona Spahiut me këngën “ E dehur jam”, ndërkaq çmimi i tretë i takoi Remzi Strumcati me këngën “Jam bandill”.
Ndërkaq në këtë mbrëmje janë ndarë edhe çmimi të madhes Nexhmije Pagarusha të cilën e fitoi Erlinda Beqiri me këngën “Njat Zaman” si dhe çmimi i publikut kësaj radhe i takoi Fatjona Malsiut me këngën “Mi ke buzët si qershi”.
Për të parë nga afër këtë festival kishin ardhur Kryetari i Komunës së Ferizajt, Bajrush Xhemaili, kryetari i Komunës së Gjakovës, Pal Lekaj, Kryetari i Komunës së Shtimes Naim Ismjali, deputet nga Parlamenti i Republikës së Kosovës si dhe zv. ministra nga Komuna e Ferizajt në Qeverinë e Republikës së Kosovës.
