Mësuesi Gafurr rrugëtimin e tij drejt dijes e nisi që nga bankat e shkollës në vendlindje, në Mirash dhe më pas në Gadime, më pas si nxënës i Shkollës së Mesme Normale në Ferizaj, të cilën e përfundoi më 1968, vit kur edhe kapi në dorë ditarin si mësues i matematikës në shkollën “Gjon Serreçi” e më pas në shkollën “Tefik Çanga” në Ferizaj, deri në vitin 2013, kur u pensionua. Ditari ishte arma e tij, fjalët ishin plumbat e dija ishte mburoja ndaj armikut shekullor serb në Kosovë. Më 1988, mësuesi Gafurr përfundon shkollën e lartë për mësues në Akademinë Pedagogjike në Gjilan, gjersa në fund të viteve ’80 studion edhe drejtësinë në Universitetin e Prishtinës, porse mbyllja e saj nga regjimi serb e bëri të ndërprente studimet.
Gjithë jetën e mësuesit Gafurr e shquan ndjenja e fuqishme atdhetare, liria e ëndrruar për shekuj e sakrificat e Dëshmorëve të Kombit. Siç shprehet vet ai “Gjithnjë kam kultivuar ndjenjën e bashkimit të popullit shqiptarë e jo ndarjes”, aq sa, lirisë së Kosovës i dha 6 nxënës të tij, përfshirë djalin e tij, Dëshmorin e Kombit, Astrit Bytyqi.
Mësuesi që pa flijimin e të birit, nxënësve të tij e shumë dëshmorëve për lirinë e atdheut, është një histori frymëzimi me qëndresën e tij, me dijen që shpërndau tek gjithë popullata, me gjeneratat që nxori, të cilët sot kanë arritur majave të karrierës profesionale, me të qenurit në krye të Shoqatës së Familjeve të Dëshmorëve të Kombit në Ferizaj, me shpirtin e bardhë e dashurinë për komb e atdhe që bëri të shtrijë kudo ku ranë dëshmorë në trojet shqiptare, homazhin e lavdinë e të rënëve dhe amanetin e Dëshmorëve të Kombit, bashkimin e kombit duke zënë fill nga parimi i tij i jetës se “..kombi dhe atdheu, janë obligim imanent i çdo shqiptari”, vlerë kjo fisnike e një patrioti e personaliteti të papërsëritshëm ferizajas, siç është mësuesi Gafurr Bytyqi.
