Kushte mjaft të volitshme për kryerjen e shërbimeve mjekësore komuna e Ferizajt krijoi në Qendrën Kryesore e Mjekësisë familjare ,Qendrën numër 1 të Mjekësisë si dhe Ish qendrës së sëmundjeve antituberkulare ,tashmë e dedikuar enkas për shërbime emergjente. Me këtë rast ,kreu i komunës së Ferizajt,Bajrush Xhemaili vlerësoi lart investimeve e bëra këtë vit në fushën e shëndetësisë.”E kemi rrumbullakësuar për këtë vit punën në shëndetësi, mendoj që këto projekte janë me një rëndësi shumë të madhe për faktin se edhe personeli mjekësor do ta ketë më të lehtë punën dhe qytetarëve do të mund t’u ofrohen shërbime shumë më të mira. Tashmë po i afrohemi rrumbullakësimit të krijimit të kushteve më të mira”, ka thënë Xhemaili, duke shtuar me tej se investime kanë bërë edhe nëpër fshatra.“Ne kemi bërë shumë edhe për fshatra, edhe në vitin tjetër do të ndajmë një buxhet edhe për ndërtimin e një qendreje tjetër emergjente”, tha kryetari Xhemaili.
Në anën tjetër edhe Bashkim Hyseni ,drejtor i Drejtorisë së Shëndetësisë dhe Mirëqenies sociale në Ferizaj theksoi se këto investime janë bërë në kuadër të grantit të shëndetësisë.”Këto investime janë në vlerë 200 mijë euro, njëra pjesë është shpenzuar në renovime ,kurse pjesa tjetër për pajisje mjekësore. Riparimi i objektit të Qendrës numër një të mjekësisë familjare ka kushtuar rreth 115 mijë euro ,nga mjetet e grantit,ku në këtë objekt është ndryshuar edhe interieri, hapësira është bërë shumë më funksionale,me mundësi të realizimit të punës me kushte standarde. Edhe ish –Dispanzeri anti-tuberkular ,pas renovimit të katit të parë të QKMF-së do të shfrytëzohet për nevoja të shërbimeve ditore dhe emergjente ,kurse kati i parë i QKMF-do të mbetet vetëm për shërbime të mjekësisë familjare”tha Hyseni.
Kurse Afrim Abazi ,drejtor i QKMF-së në Ferizaj tha se tri qendra janë rinovuar dhe tashmë janë krijuar kushte tejet të mira për trajtimin e pacientëve. Me këtë rast krahas fitimit të këtyre hapësirave ,fiton edhe qytetari mundësitë janë shumë më të mëdha për ofrimin e një komoditetit më të madh për qytetarët përkatësisht për pacientët.”Kemi të bëjmë më një cilësi shumë më të madhe të shërbimeve që e kemi pasur edhe me herët”, tha Abazi.
U bë e ditur se në këto Qendra të Mjekësisë Familjare do të ketë pajisje të reja dhe shërbimet e qytetarëve do të jenë shumëfish më të mira dhe më të shpejta.
Me këtë rast Qendra kryesore e Mjekësisë Familjare në Ferizaj, është bërë edhe me një autoambulancë të re.
Në prag të përfundimit të vitit që po e lëmë pas ,në Ferizaj u bë përurimi i renovimit të tri objekteve shëndetësore.
