Faton Sojeva përveç profesionit të tij, të qenurit profesor i ekonomisë nga 1986-1991 dallohej për talentin e tij të veçantë nw futboll, çka bëri që në moshë fare të re, më 1975 të hynte si pioner në ekipin e trajnerit të mirënjohur Xhemajl Xheladini, ku ishte pjesë bashkë me emra tjerë të të parëve të futbollit ferizajas, atyre që hodhën themelet e sukseseve kulminante e zhvillimit të futbollit në Ferizaj. Kjo gjeneratë që luajti në kategorinë juniorë, kaloi në ekipin e parë shumë shpejt, për të qenë një nga ekipet më të fuqishme e aspirante për suksese kulmore në ligat e atëhershme të futbollit. Si 18 vjeçar, Faton Sojeva më 1979 debutoi kundër “Interplastit” dhe ekipeve të shumta, duke u shquar gjithmonë për zhdërvjelltësinë e profesionalizmin e tij të lartë, karrierë sportive që zgjati deri më 1991 ku për shumë vite ishte kapiten i ekipit të “Borcit” të Ferizajt, e ku pas vitit 1989, kur u uzurpuan hapësirat sportive e u pamundësua gara, dha kontributin e tij në organizimet sportive paralele, duke qenë edhe anëtar i Kryesisë së Sportive në Ferizaj, bashkë me legjendën e sportit tonë Sefedin Reçica, gjersa kishte ftesën të luante për ekipin e Prishtinës në Ligën e Dytë Federative, por këto mbetën vetëm ëndrra të ndaluara nga regjimi serb.
Më 1992, emigroi në Norvegji, por nga pasioni për futbollin nuk hoqi dorë, duke luajtur edhe atje në Ligën e parë, më pas më 1995 në Gjermani u angazhua suksesshëm në “Verbandsliga” dhe “Landesliga”, por angazhimi i tij është edhe sot, duke qenë i gatshëm e kontributor me ekipin e veteranëve të futbollit të Ferizajt, me të cilët mbrojti ngjyrat e klubit në gara të ndryshme në Turqi e gjetiu, dëshmi këto të vlerësuara dhe të çmuara lartë mes sportistëve dhe adhuruesve të sportit.
