Drejtori i Drejtorisë së Kulturës, Rinisë dhe Sportit në Ferizaj, Naim Ferati, duke vlerësuar lart këtë eveniment, ka thënë se shfaqjet pjesëmarrëse në festival do të jenë nga Kosova, Shqipëria, Maqedonia dhe Presheva. “Këtë vit kemi edhe risi, çdo ditë gjatë ditëve të festivalit do të ketë nga dy shfaqje në ditë dhe qytetarët tanë do të kenë mundësi që të përcjellin produksione të ndryshme dhe shfaqje të një niveli mjaft profesional”, ka thënë drejtori Ferati, duke bërë të ditur se të një rëndësi të veçantë janë edhe aktivitetet tjera kulturore që do të organizohet këto ditë sa do të zgjasë festivali. “Çdo natë do të ketë këngëtarë të ndryshëm, koloni të piktorëve, orë letrare, ligjërata dhe aktivitete të tjera”, ka thënë Ferati. dhe sport
Edhe regjisori Fatmir Hyseni, njëherësh drejtor i Teatrit Profesionist “Adriana”, në Ferizaj vlerësoi lart organizimin e këtij festivali, i cili po realizohet në mënyrë profesionale, duke përmendur edhe emra të njohur të regjisë që do të jenë pjesë e kësaj ngjarjeje kulturore. “Niveli artistik i këtyre shfaqjeve është nivel shumë korrekt, ku ka edhe emra të njohur të artistëve. Është një konkurrencë, ku ka regjisor të ri dhe të vjetër dhe do të jetë shumë interesante për publikun”, ka thënë Hyseni, duke bërë të ditur se edhe temat që shtjellohen në këto shfaqje janë shumë interesante, pasi që janë tema që lidhen me kohën që tani po jetojmë.
Ndërsa sa i përket mbulimit të shpenzimeve të këtij festivali ,numri një i Drejtorisë për Kulturë në Ferizaj, Naim Ferati ka thënë se përveç drejtorisë, e cila do t’i heqë shpenzimet, me një shumë modeste do të participojë edhe ministria përkatëse. “Ka një kosto mjaft të lartë, ngase janë trupat që do të qëndrojnë 7 ditë këtu në Ferizaj. Ne kemi marrë një përkrahje modeste nga ministria, rreth 5 mijë euro, por në përgjithësi kostoja e festivalit është shumë, shumë më e lartë se 5 mijë euro”, ka thënë Ferati.
Ndërkohë që, deri më tani bëhet e ditur se mbi 90 për qind të trupave të teatrove e kanë konfirmuar pjesëmarrjen në këtë festival.
Kanë përfunduar të gjitha përgatitjet e Drejtorisë për Kulturë, Rini dhe Sport në Ferizaj, për realizimin e festivalit tashmë tradicional të teatrove, i cili do të zhvillohet si edicion i 41-ti me radhë për 7 netë rresht nga 21 tetori në Ferizaj.
